Donald Trump, nýkjörinn Bandaríkjaforseti, er gjarn á að hlutgera konur. Breskir fjölmiðlar hafa nú rifjað upp að eiginkona leikmanns Manchester United sé fallegasta kona sem Trump hafi á ævinni séð. Mirror greinir frá þessu.
Trump, sem er sjötugur, sagði fyrir þremur árum, þegar hann hitti þáverandi forsætisráðherra Serbíu, Ivica Dacic, að landi hans, tenniskonan Ana Ivanovic, væri fallegasta kona sem hann hafi augum litið. „Hún er fallegasta konan sem ég hef á ævinni séð. Einfaldlega fallegust allra,“ lét hann hafa eftir sér. Þarna var hann í heimsókn í Serbíu í viðskiptaerindum.
Ivanovic, 29 ára, er þekkt tennisleikkona og eiginkona þýska leikmannsins Bastian Schweinsteiger, sem hefur verið úti í kuldanum hjá enska liðinu um skeið.
Dacic, sem nú er utanríkisráðherra landsins, segir um fundinn við Trump: „Í korter talaði hann bara um Ivanovic, hvað hún væri falleg kona og að hún væri einfaldlega fallegasta kona jarðar.“
Leiðir þeirra Ivanovic og Trump lágu saman árið 2014 en þau stilltu sér saman upp á mynd. Hún deildi myndinni á Twitter með orðunum: „Meeting with the boss“.
Dacic var á sínum tíma spurður hvers vegna Trump væri svona hrifinn af Serbíu. Hann svaraði því til að Ivanovic væri ástæðan. Hann væri heltekinn af fegurð hennar. Serbneskir fjölmiðlar hafa í tilefni forsetakjörs Trumps, rifjað upp ummælin.
