Kvikmyndin Skjálfti, sem byggir á verðlaunabók Auðar Jónsdóttur, Stóri skjálfti, hefur hlotið vilyrði fyrir framleiðslustyrk frá Kvikmyndamiðstöð fyrir árið 2020. Framleiðandi er Hlín Jóhannesdóttir undir merkjum Ursus Parvus, en Freyja Filmwork meðframleiðir ásamt fleirum. Tinna Hrafnsdóttir leikstýrir en stuttmyndir hennar hafa hlotið verðlaun bæði hér heima og erlendis. Þróunarferlið hefur gengið vel og hefur verkefnið verið valið inn á ýmsar virtar handrita- og kvikmyndasmiðjur, til að mynda TIFF Filmmakers Lab á kvikmyndahátíðinni í Toronto á síðasta ári, sem og mikilvæga alþjóðlega samframleiðslumarkaði.
Stóri skjálfti var gefin út af Máli og Menningu árið 2015 og var tilnefnd til Íslensku bókmenntaverðlaunanna. Bókin hlaut enn fremur Íslensku bóksalaverðlaunin og tilnefningu til Menningarverðlauna DV. Bandaríska útgáfufyrirtækið Dottir Press tryggði sér nýverið útgáfuréttinn á bókinni á ensku. Áður höfðu þýski útgáfurisinn RandomHouse /btb og unverski útgefandinn Gondolat Kiado tryggt sér útgáfurétt bókarinnar.
