Það er ekki vel séð í flestum kirkjum að kirkjugestir séu með farsíma sína uppi og að nota þá á meðan helgihald fer fram. En í Aylsham Parish kirkjunni í Norfolk á Englandi eru kirkjugestir hvattir til að nota farsíma sína á meðan helgihaldið fer fram. Þeir eru þó ekki hvattir til að nota Facebook eða lesa DV.is á meðan á messu stendur. Það er nýtt app sem þeir eru hvattir til að nota.

Appið er gagnvirkt og gerir notendum kleift að svara spurningum, gefa sálmum einkunn og taka þátt í ”orðaskýi” sem sýnir hverju söfnuðurinn hefur verið að biðja fyrir.  Þeim mun fleiri sem skrifa ákveðið orð í orðaskýið þeim mun stærra verður letur þess í skýinu. Sky skýrir frá þessu.

Haft er eftir séra Andrew Beane, sóknarpresti, að appið veiti kirkjunni, sem bíður upp á frítt netsamband, tækifæri til að „vera miklu gagnvirkari í starfi sínu“. Hér sé um ákveðið frumkvöðlastarf að ræða þar sem haldið sé í hefðirnar en nýrri tækni jafnfram tekið fagnandi.