Akureyringurinn Halldór Helgason snjóbrettamaður er tilnefndur til þriggja verðlauna af vinsælasta og virtasta tímaritinu í snjóbrettaheiminum, Transworld Snowboarding.

Halldór er tilnefndur annað árið í röð sem snjóbrettamaður ársins, en þau verðlaun eru valin af 100 fremstu snjóbrettamönnum heims, sem uppáhalds snjóbrettamaður lesenda tímaritsins og fyrir besta atriði ársins í snjóbrettamynd.

Atriðið sem Halldór er tilnefndur fyrir er úr myndinni The Future of Yesterday, sem kom út i haust. Myndin er einnig tilnefnd sem snjóbrettamynd ársins en bróðir Halldórs, Eiríkur Helgason, er einnig með atriði í myndinni.

Aðrir sem tilnefndir eru sem snjóbrettamenn ársins eru Torstein Horgmo, Kazu Kokubo, Eric Jackson og Austin Sweetin. 

Halldór er einn af viðmælendum í þriðju seríu Atvinnumenn Íslands sem Auðunn Blöndal vinnur nú að.

Fylgjast má með Halldóri á Facebook og Instagram.