Framleiðsludúóið Andvari var fengið til að vinna nýtt myndband við lagið Golddigger með Aroni Hannesi sem keppir til sigurs í Söngvakeppni Sjónvarpsins næstkomandi laugardag en myndbandið verður frumsýnt í Laugarásbíói í dag klukkan 18:00. Andvari samanstendur af þeim Guðnýju Rós Þórhallsdóttur og Birtu Rán Björgvinsdóttur en þær hafa undanfarin misseri framleitt eigin tónlistarmyndbönd og stuttmyndir og hlotið mikið lof og verðlaun fyrir.

Það var Guðný Rós sem gerði handritið að myndbandinu og leikstýrði en Birta Rán var á bakvið myndavélina. Þá voru aðstoðartökumaðurinn og aðstoðarleikstjórinn einnig kvenkyns. Því má segja að konur hafi verið í lykilstöðum við gerð myndbandsins en í atriðinu sjálfu eru bara strákar.

„Ég held að þeir hafi bara haft gott af þessari kvenlegu orku“ segir Hekla Elísabet Aðalsteinsdóttir, aðstoðarleikstjóri og meðframleiðandi og bætir við „Það er í rauninni fáránlegt að ég er búin að vera viðriðin þennan bransa í nokkur ár, bæði í auglýsinga- og myndbandagerð, og aldrei áður hef ég fengið að vinna með kvenkyns leikstjóra eða tökumanni. Samstarfið var frábært og afraksturinn alveg eftir því svo við hlökkum öll mikið til að sjá það á stóra tjaldinu í kvöld”

Þeim sem vilja sjá frumsýninguna í kvöld er bent á Facebook síðu Arons Hannesar en þar er hægt að skrá sig á gestalista.