Andrés Magnússon, blaðamaður á Viðskiptablaðinu, kallar í dag eftir skýringum frá Kastljósinu á sínum þætti í Samherjamálinu svokallaða. Hæstiréttur felldi úr gildi stjórnvaldssekt Seðlabanka Íslands í garð Samherja á dögunum, fyrir meint brot á gjaldeyrislögum. Þegar rannsókn málsins hófst, var greint frá því að tilefni rannsóknarinnar væri vegna ábendinga starfsmanna Kastljóssins:
„Rannsóknarblaðamenn þess höfðu þá skoðað málefni tengd útflutningi sjávarafurða og m.a. borið gögn um þau undir gjaldeyriseftirlit Seðlabankans. Í framhaldi af því hafi rannsóknin hafist, en gjaldeyriseftirlitið hefði farið þess á leit við Kastljós að það héldi í sér til að verja mikilvæga rannsóknarhagsmuni og við því var orðið,“
segir Andrés. Kallar hann eftir afsökunarbeiðni frá Kastljósinu:
„Þessar lyktir málsins, ríflega sex árum síðar, hljóta að kalla á frekari skýringar Kastljóss, viðurkenningu á að fréttin hafi reynst röng og afsökunarbeiðni. Eitthvað hefur greinilega verið bogið við gögnin, vinnslu þeirra eða heimildamennina (sem hljóta að hafa verið fleiri en einn). Nema auðvitað að RÚV sé búið að semja um himinháa greiðslu til Samherja án þess að segja neinum.“
Í bókinni Gjaldeyriseftirlitið eftir Björn Jón Bragason, er greint frá því að Helgi Seljan, fréttamaður Kastljóssins, hafi verið staddur í þorrablóti á Austfjörðum árið 2012, þegar hann hafi fengið upplýsingar um meint brot Samherja. Þetta kemur fram á Viljanum. Ku fyrrum sjómaður Síldarvinnslunnar á Neskaupsstað hafa sagt Helga frá vangaveltum sínum um að Samherji væri að selja karfa til dótturfélaga sinna erlendis, á undirverði. Hafi Helgi haldið á fund starfsmanna Gjaldeyriseftirlitsins í kjölfarið og hafi Samherji verið á allra vörum upp frá því.
