Skilyrði fyrir skógarelda eru óvíða betri en í Kaliforníu en ríkið er nánast eins og púðurtunna hvað þetta varðar. Það er samblanda gróðurs og loftslags sem gerir þetta að verkum. Það er hlýtt í ríkinu og þar rignir og því sprettur gróður vel. En þegar þurrkar herja verður meira en þurrt, það verður skraufaþurrt.
Um þriðjungur ríkisins er skógi vaxinn en af ríkjum Bandaríkjanna er aðeins meira skóglendi í Alaska. En þvert á það sem gerist í hinu kalda Alaska þá er hlýtt í Kaliforníu og á sumrin gufar vætan í gróðrinum upp og hann verður skraufaþurr. Barrtré fella þurrt barrið og vatnið í trjánum gufar upp en skilur eftir sig olíur í greinunum sem eru sérstaklega eldfimar. Það þarf því ekki stóran neista til að eldur gjósi upp.
Síðasta ár var versta ár sögunnar hvað varðar skógarelda í ríkinu en yfirstandandi ár lítur út fyrir að verða enn verra að sögn Vox. Margir sérfræðingar telja að hér sé loftslagsbreytingunum um að kenna. Samkvæmt frétt New York Times hefur meðalhitinn í Kaliforníu hækkað um 1 til 1,7 gráður á síðustu árum af völdum loftslagsbreytinganna. Þetta hefur haft í för með sér að níu af tíu verstu skógareldum sögunnar í ríkinu hafa orðið á þessari öld.
Kalifornía fer verr út úr skógareldum en Mexíkó, sem er sunnar, því í Kaliforníu verður aldrei alveg þurrt eins og í Mexíkó. Þar rignir á milli svo stórir skógar geta vaxið. Í Mexíkó er aftur á móti þurrara og eiginlega hálfgerð eyðimörk. Það bætir ekki stöðuna í Kaliforníu að öflugir vindar blása af Kyrrahafi inn yfir ríkið og þeir ýta undir eldinn og útbreiðslu hans.
Það hefur einnig sín áhrif á tíðni og alvarleika skógarelda í Kaliforníu að íbúum þar hefur fjölgað mikið á undanförnum árum. Frá 2000 til 2010 fjölgaði íbúum ríkisins um þrjár milljónir og sífellt fleiri búa nærri skógum og fjöllum. Þetta eykur líkurnar á að fólk kveiki elda fyrir slysni. Niðurstöður rannsóknar sýna að 84 prósent skógarelda í Bandaríkjunum eru af mannavöldum.
Góður árangur slökkviliða í Kaliforníu við að halda skógareldum niðri síðustu tæpu öldina skapar einnig ákveðinn vanda í dag þótt það kunni að hljóma eins og ákveðin þversögn. Af þessum sökum hafa skógareldar ekki fengið að geisa eins og þeir þurfa að gera en skógareldar eru náttúrulegur hluti af þróun og vexti skóganna í ríkinu. Þeir ryðja neðstu lögin svo ný tré geti sprottið. Baráttan við skógareldana síðustu áratugana hefur einmitt komið í veg fyrir þetta og því liggja milljónir dauðra trjáa á jörðinni og þau eru mikill eldsmatur enda skraufaþurr. The Guardian segir að í Kaliforníu séu um 130 milljónir trjáa sem liggi bara á jörðinni og bíði eftir neista.
