Fjölmiðlamaðurinn og skemmtikrafturinn Sólmundur Hólm Sigurðsson kynnti Edduverðlaunin annað árið í röð síðastliðið sunnudagskvöld. Sóli, eins og hann er ávallt kallaður, stóð sig vel að vanda. Sóli greindist með eitlakrabbamein í fyrra, sem hann er nú laus við og er hann byrjaður með nýja uppistandssýningu í kjallara Hard Rock.
En hvað segir stóri bróðir, Sigurður Sólmundarson fjöllistamaður, um þennan öfluga bróður sinn?
„Sóli var stórundarlegt barn og ef ég hefði þurft að giska á hvað hann tæki sér fyrir hendur í framtíðinni, hefði ég giskað á raðmorðingja frekar en skemmtikraft. Hann var hræddur við fólk almennt en hann hefur samt alltaf haft mikinn og frekar súran húmor sem kemur mjög skemmtilega fram í sýningunni hans. Mér hefur þótt hann halda aftur af sér þangað til núna. Sóli er einstaklega traustur, næmur og er alltaf til staðar þegar maður þarf á honum að halda. Það kom í ljós hvað hann er magnaður persónuleiki í veikindum hans sem hann sigraðist á með miklum glans. Ég er glaður að sjá hvar hann er í dag því þetta leit alls ekki vel út hjá honum í æsku. Ég er ákaflega montinn af honum.“
