„Ég einangraðist mikið eftir að ég greindist með brjóstakrabbameinið 2013 og bjó í Svíþjóð. Ég vann ekki mikið í veikindunum og þar var enginn andlegur stuðningur eða tengslanet. Þó svo að ég eigi trygga vini á Íslandi, er erfitt að vera langt í burtu frá þeim þegar maður gengur í gegnum veikindi,” segir Olga Steinunn Weywadt Stefánsdóttir. Eftir greiningu árið 2013 fór Olga í lyfjameðferð, brjóstnám og geisla. Hún endurgreindist árið 2015 og þá voru komin meinvörp í lifur, hrygg og mjöðm. Leg og eggjastokkar voru fjarlægðir, en krabbameinið er ólæknandi og er haldið niðri með hormónameðferð og inndælingu lyfja á þriggja mánaða fresti.

Olga er ein af þeim konum sem segja sögu sína í tengslum við átak Bleiku slaufunnar 2018, en líkt og undanfarin 11 ár tileinkar Krabbameinsfélag Íslands októbermánuð baráttu gegn krabbameini hjá konum. Hér má finna heimasíðu átaksins.

Eftir fyrstu greininguna flutti Olga og fjölskylda hennar heim til Íslands, en þau bjuggu áður í 14 ár í Svíþjóð. Þau  hafa notið starfsemi Krafts og Ljóssins eftir að þau fluttu til landsins og fundið þar stuðning sem þau höfðu ekki upplifað í Svíþjóð.

Olga telur mikilvægt að velta dauðanum fyrir sér og taka hann í sátt: „Sérstaklega þegar hann hangir svona fyrir ofan mig og andar ofan í hálsmálið á mér og fjölskyldunni. Ég sætti mig auðvitað ekki við að deyja og hræðist það á vissan hátt, en ég vil eiga góð ár framundan. Mér finnst líka mikilvægt að ræða um dauðann við lífsförunautinn og fara yfir helstu óskir manns.“

Á heimasíðu átaksins Bleika slaufan má finna sögu Olgu í heild sinni og lesa sögur annarra kvenna sem greinst hafa með krabbamein.

Aukin áhersla á þátttöku kvenna í skimun

Líkt og undanfarin 11 ár tileinkar Krabbameinsfélag Íslands októbermánuð baráttu gegn krabbameini hjá konum. Söfnunarfé Bleiku slaufunnar í ár verður varið til þeirrar fjölbreyttu starfsemi sem Krabbameinsfélagið stendur fyrir, með sérstakri áherslu á krabbamein hjá konum og hvatningu um að mæta í skimun fyrir brjósta- og leghálskrabbameinum.

Vinahópar skipta máli

Á heimasíðu átaksins segir: „Í Bleiku slaufunni í ár viljum við taka höndum saman við vinnustaði, saumaklúbba og aðra vinahópa sem hafa sýnt sig að vera dýrmætur stuðningur við þá félaga sem veikjast af krabbameini og fá þá til að taka í sameiningu ábyrgð á því að „konurnar þeirra“ nýti tækifæri til reglubundinnar skimunar.“