Það getur verið skemmtilegt að láta hugann reika til gamalla tíma og fá smá nostalgíukast. Því ákváðum við að kíkja á tíu drykki sem lifa í minningunni, þótt þeir finnist ekki lengur í verslunum.
Það þótti afar svalt að drekka Svala með sítrónubragði hér í denn, og var það til marks um að maður væri með allt á hreinu og í toppmálum. Svo hvarf Svalinn og unga kynslóðin fór á hliðina. Enn þann dag í dag poppa reglulega upp hópar af fólki sem saknar Svalans, og var meira að segja blásið til undirskriftasöfnunar í fyrra til að fá Sítrónu Svalann aftur.
Mjólkursamsalan var með áhugavert útspil um miðbik tíunda áratugar síðustu aldar og setti kakódrykkinn Kókó á markað, sem var bara eins og slæm útgáfa af Kókómjólk.
Það skemmtilega við appelsínudrykkinn Topp frá Sól sem kom á markað á níunda áratug síðustu aldar voru klárlega auglýsingarnar. Komið var fyrir eins konar sápupumpu til að skenkja safann og var hún heldur betur ólystug.
Sunsip appelsínudrykkurinn var til á sjöunda áratug síðustu aldar, en um þykkni var að ræða, sem var auglýstur sem bragðljúfur og alls ekki fitandi. Með auglýsingunum fylgdu leiðbeiningar um hvernig átti að blanda þykkni, enda afar vandasamt verk.
Seltzer og Diet Seltzer frá Sól eiga sérstakan stað í hjörtum margra og sakna einhverjir hans úr hillum stórverslana.
Það var sérstaklega tekið fram í auglýsingum fyrir safann Gosa frá Mjólkursamsölunni að hann innihéldi sætuefnið aspartame, sem í dag er talið vera afar skaðlegt.
TAB er að sjálfsögðu ekki íslenskur drykkur en mikið sem hann átti marga aðdáendur á Íslandi. Það ætlaði allt um koll að keyra þegar sölu á TAB-i var hætt og margir hömstruðu drykkinn áður en hann hvarf af markaði.
Safinn Frissi Fríski átti gríðarlegum vinsældum að fagna á síðustu öld, en margir muna eflaust eftir Frissa Fríska-gosinu sem var framleitt vegna gríðarlegra vinsælda safans. Gosið missti þó hins vegar marks.
Í svona upptalningu má aldrei gleyma svalandi drykknum Garpi frá Mjólkursamsölunni sem fólk annaðhvort hataði eða elskaði. Við erum að tala um drykk sem var blanda af mysu og appelsínusafa. Hljómar skringilega, en sem betur fer er smekkur manna mismunandi.
Fyrirtækið Sól var grimmt í drykkjarframleiðslu og nýjungum á seinni hluta síðustu aldar. Meðal drykkja úr smiðju fyrirtækisins var Ís-Cola sem var framleitt til höfuðs Coca Cola. Ákveðið stríð ríkti á milli þessara tveggja drykkja, stríð sem rataði meira að segja á síður fjölmiðla. Og að lokum hafði gamla Coca Cola-ð betur.
