Margir kannast eflaust við leikkonuna Tiffani Thiessen, en hún lék Valerie Malone í sjónvarpsþáttunum Beverly Hills 90210 hérna í denn. Tiffani gaf nýverið út sína fyrstu uppskriftarbók sem heitir Pull Up a Chair: Recipes From My Family To Yours, sem inniheldur 125 uppskriftir; allt frá kósí kvöldmat til girnilegra eftirrétta.
Að því tilefni fór tímaritið Us Weekly í heimsókn til Tiffani og plataði hana til að baka sína uppáhaldsköku – rjómaostaböku móður sinnar.
Hér fyrir neðan má sjá myndband af bakstrinum og fyrir neðan það er uppskriftin.
Botn – Hráefni:
1½ bolli fínmulið hafrakex
6 msk. smjör
¼ bolli flórsykur
1 tsk. kanill
Aðferð:
Hitið ofninn í 175°C. Blandið þurrefnum vel saman og bætið síðan smjörinu út í. Þrýstið blöndunni í botninn og upp á hliðar kökuforms sem er sirka 22 sentímetra stórt og bakið í 10 mínútur. Látið botninn kólna alveg en ekki slökkva á ofninum.
Rjómaostafylling – Hráefni:
225 g mjúkur rjómaostur
2 stór egg
¾ bolli sykur
2 tsk. vanilludropar
Aðferð:
Blandið öllum hráefnum vel saman þar til blandan er silkimjúk. Hellið blöndunni varlega yfir kaldan botninn og dreifið úr henni. Bakið í 25 til 30 mínútur. Leyfið bökunni að kólna á meðan þið gerið toppinn. Aftur, ekki slökkva á ofninum.
Toppur – Hráefni:
1 bolli sýrður rjómi
3½ msk. sykur
1 tsk. vanilludropar
Aðferð:
Blandið öllum hráefnum hráefnum vel saman þar til blandan er silkimjúk. Dreifið toppinum yfir bökuna og bakið í 10 mínútur. Leyfið bökunni að kólna á eldhúsborði og kælið bökuna síðan í ísskáp í að minnsta kosti 4 klukkutíma.
