Kristinn Sigurjónsson, lektor við tækni- og verkfræðideild Háskólans í Reykjavík, segir innan lokaða Facebook-hópsins Karlmennskuspjallið að hann vilji síður vinna með konum eða hafa þær nærri sér. Samkvæmt vefsíðu HR kennir hann nokkra kúrsa í vetur, þar á meðal Raforkukerfi I og Kraftrafeindatækni.

Hann lét þessi orð falla í athugasemdum við mynd sem Eyjólfur Vestmann Ingólfsson deildi en myndina má í grófum dráttum lýsa sem ákalli til karla um að hætta að leiðbeina eða starfa einir með konum. Eyjólfur er helst þekktur fyrir að hafa tekið yfir stjórnmálaflokkinn Flokk heimilanna.

Kristinn segist mjög sammála skilaboðum myndarinnar. „Ég er svo hjartanlega sammála, það á að aðgreina vinnustaði karla og kvenna. Vandinn er bara að konur reyna alltaf að troða sér þar sem karlmenn vinna, og um leið og þær eru komnar inn, þá byrja þær að eyðileggja hann, því allir kalmennirnir eiga þá að fara að tala, hugsa og hegða sér eins og kerlingar, allt annað er áreiti og ef sagður en neðanbeltisbrandari, svo ég nefni ekki klámbrandari, þá er það kynferðisofbeldi,“ segir Kristinn.

Eyjólfur svarar honum og segir: „Ég vil ekki hafa þetta svona, ég vil að konur og karlar vinni saman, en það er bara ekki svo auðvelt þegar það er hægt að eyðileggja þig bara upp úr þurru og án þess að þurfa að sanna nokkurn skapaðan hlut.“

Kristinn bætir þá við að hann vilji helst ekki starfa með konum. „Með viðhorfin eins og þau eru í dag, þá vil ég síður vinna með konum eða hafa þær nærri mér.“