Bæjarráð Akureyrarkaupstaðar samþykkti á miðvikudag ráðningarsamning Ásthildar Sturludóttur, bæjarstjóra, sem ráðin var 14. september.

Ásthildur hlýtur 1.150 þúsund krónur á mánuði í dagvinnulaun, háð launavísitölu. Stjórnendaálag er 517.000 krónur, eða sem nemur 45% af mánaðarlaunum, en það er sagt vera þóknun fyrir unna yfirvinnu og allt áreiti utan dagvinnutíma, undirbúning, ferðatíma, móttökur gesta og annað tilfallandi.

Samtals eru því heildarlaun Ásthildar 1,667,500 krónur á mánuði.

Ásthildur fær ekki greitt aukalega fyrir setu í bæjarstjórn, bæjarráði eða öðrum nefndum. Hún mun halda úti akstursdagbók og fá greitt fyrir notkun á eigin bifreið sem því nemur, ásamt því að fá greiddan kostnað vegna farsíma og nettengingar, en bærinn greiðir símtæki og fartölvu Ásthildar.

Þá kaupir Akureyrarbær líf- og slysatryggingu fyrir bæjarstjóra, samkvæmt gildandi samningi við tryggingarfélag sveitarfélagsins.

Gagnkvæmur uppsagnarfrestur er þrír mánuðir. Samkomulag er um að við starfslok í lok kjörtímabils verði laun greidd á uppsagnarfresti í þrjá mánuði og að auki þriggja mánaða biðlaun.