Veganistan Vanessa Croessmann heldur úti blogginu Vegan Family Recipes þar sem hún deilir ýmsum vegan uppskriftum, jafnt fyrir stóra sem smáa.

Það má með sanni segja að uppskriftir Vanessu séu litríkar og girnilegar og nýtur hún talsverðra vinsælda hjá matarunnendum, bæði þeim sem eru vegan og þeim sem leggja sér kjöt til munns.

Hér er ein af uppskriftunum hennar Vanessu, en þessi súpa kemur skemmtilega á óvart. Hún er fallega græn og afskaplega bragðgóð og jafnvel yngsta kynslóðin vílar ekki fyrir sér að borða allt það græna sem í hana fer.

Blóm- og grænkálssúpa

Hráefni:

1 msk ólífuolía
1 laukur, saxaður
4 hvítlauksgeirar, saxaðir
1 blómkálshaus
3-4 bollar af grænkáli (ekki stilkana með samt)
2,5 l grænmetissoð

Aðferð:

Skerið blómkálshausinn í bita. Hitið ólífuolíu í stórum súpupotti og bætið lauknum út í olíuna þegar hún hefur náð góðum hita. Steikið laukinn í 5 til 7 mínútur eða þar til laukurinn verður gegnsær. Bætið þá hvítlauknum út í og steikið í 2 mínútur til viðbótar þar til hvítlaukslyktin fyllir vitin.

Bætið blómkáli, grænkáli og soðinu við og náið upp suðu í súpunni. Lækkið síðan hitann og leyfið súpunni að malla í 10 til 15 mínútur, eða þar til kálið er farið að mýkjast. Takið þá pottinn af hellunni og maukið herlegheitin með töfrasprota. Setjið pottinn aftur á helluna og látið malla í 10 mínútur til viðbótar.

Hægt er að gera súpuna rjómalagaða með því að bæta einum bolla af kókosmjólk saman við og leyfa súpunni að malla í aðrar 5 mínútur.
Vanessa segir súpuna alls ekki vera heilaga og að fólk geti leikið sér með ýmis krydd við gerð hennar, allt eftir smekk.