Paul Pogba fékk þau skilaboð í gær um að hann myndi aldrei bera fyrirliðabandið hjá Manchester United á nýjan leik.

Þessi franski miðjumaður hefur borið bandið þrisvar á þessu tímabili en Mourinho telur hegðun hans ekki lengur ásættanlega. Leikmannahópur United fékk að vita þetta í gær fyrir tap gegn Derby í deildarbikarnum. Pogba var ekki í leikmannahópi United, hann horfði úr stúkunni.

,,Eina sem er satt er að ég hef tekið ákvörðun um að Pogba verður ekki varafyrirliði lengur, ég ákvað að hann yrði það en það kom ekkert upp. Þetta er bara ákvörðun sem ég þarf ekki að útskýra,“ sagi Jose Mourinho, stjóri United.

Paul Pogba hefur tjáð Jose Mourinho að hann vilji burt frá Manchester United en hann reynir að koma sér til Barcelona. Samkvæmt Daily Mail er ástæða þess að Pogba fær ekki fyrirliðabandið aftur sú að hann vill fara frá félaginu.

Samband Mourinho og Pogba hefur orðið slæmt á síðustu 18 mánuðum, sagt er að þeir hafi átt í miklum samskiptum síðustu vikur, á kvöldin spjalla þeir saman í gegnum sms skilaboð. Sögusagnir halda áfram.

Pogba hefur tjáð Ed Woodward að hann vilji fara og Mino Raiola, umboðsmaður hans hefur náð samkomulagi við Barcelona um kaup og kjör.

Woodward vill ekki selja sína skærustu stjörnu en það verður erfitt að halda honum eftir síðasta útspil Mourinho, hann hefur fengið nóg af honum. Hegðun Pogba er áhyggjuefni fyrir Mourinho og starfslið hans.

Þjálfaraliðið var mjög ósátt með hegðun Pogba fyrir leikinn gegn Wolves á laugardag, í stað þess að hugsa og einbeita sér að leiknum var hann að spila háa tónlist í rútunni á leið í leikinn.

Pogba hefur einnig vakið athygli fyrir að mæta með einkabílstjóra á hótel liðsins þar sem hann kemur á Rolls-Royce.

Þá var pirringur í Mourinho eftir sigur á Burnley á dögunum, allir leikmenn fóru til baka með rútunni en ekki Pogba. Hann vildi komast út á flugvöll og lét keyra sig á sínum bíl til að komast beint í verkefni með franska landsliðinu.