„Það hafa verið deilur í eigendahópnum og niðurstaðan er sú að við skiluðum inn leyfinu sem var á nafni framkvæmdastjóra okkar,“ segir Kamran Keivanlou, sonur annars eiganda hins vinsæla veitingastaðar og næturkúbbs, Austur við Austurstræti. Austur var lokaður í gær og segir Kamran að Austur verði einnig lokaður í kvöld. Einn heimildarmaður sem þekkir vel til segir að ástæðuna fyrir lokuninni hafi verið brottrekstur framkvæmdastjórans, Víkings Heiðars Arnórssonar. Víkingur er skráður fyrir rekstrarleyfinu og segir einn heimildarmanna DV að hann hafi skilað því inn og tekið allt starfsfólkið með sér. Kamran aftur á móti segir að Víkingur hafi unnið sitt starf vel af hendi. Ekki náðist í Víking við vinnslu fréttarinnar.
Austur hefur verið í eigu tveggja Írana, Effat Kazemi Boland og Gholamhossein Mohammad Shirazi, báðir eigendur áttu hvor um sig helmingshlut en deilur hafa staðið yfir um eignarhaldið. Fyrrnefndi eigandinn, Boland, er 72 ára gömul kona. Sonur hennar, áðurnefndur Kamran, hafði svo samband við DV í dag og skýrði frá því að staðnum hefði nú verið lokað.
Eins og kom fram í Viðskiptablaðinu fyrr á árinu var félag annars eigandans úrskurðað gjaldþrota. Kamran segir að við það hafi ríkið eignast helmingshlut í Austur en fjölskylda hans áfram átt helmingshlut í staðnum. Áður hefur Morgunblaðið greint frá því að Kamran sjálfur hafi verið úrskurðaður gjaldþrota í mars 2016 en Hæstiréttur sneri úrskurði Héraðsdóms við.
Austur var ekki opið í gær og segir Kamran að fastagestir staðarins hafi verið mjög slegnir yfir því. „En við erum búin að skila leyfinu og loka staðnum. Það verður því lokað á Austur í kvöld,“ segir Kamran sem vill meina að það sé vegna svika sameiganda sem hafi vikið framkvæmdastjóranum frá störfum án þess að hafa til þess heimild.
Allmiklar og nokkuð torræðar deilur hafa verið á milli eigenda staðarins í nokkur ár. Sem dæmi um þær deilur sem hafa átt sé stað þá kærðu bæði fyrrverandi eigandi Austur, Ásgeir Kolbeinsson Kamran fyrir hótanir sem hann sagðist hafa á upptöku. Kamran vildi meina að upptökurnar væru falsaðar og kærði Ásgeir til sérstaks saksóknara. Þá greindi Kjarninn frá því að Kamran hefði krafist þess að kortafyrirtækið Borgun hætti viðskiptum við félagið Austurstræti 5, þar sem núverandi rekstur skemmtistaðarins sé ekki í samræmi við útgefið rekstrarleyfi. Þetta er aðeins brotabrot af þeim deilum sem hafa átt sér stað síðustu ár. En nú hefur staðnum verið lokað að sögn Kamran.
Hinn frægi fjölmiðlamaður Ásgeir Kolbeins átti Austur alfarið um tíma en losaði sig fyrir nokkru við hlut sinn í staðnum. Er DV hafði samband við Ásgeir kom hann af fjöllum og vissi ekkert um lokun staðarins. DV hefur hins fengið staðfest frá fleiri aðilum sem tengjast rekstri staðarins að Austur verði ekki opinn í kvöld.
Uppfært: Í upphaflegu fréttinni var sagt að Kamran hefði verið úrskurðaður gjaldþrota. Það sem vantaði í fréttina er að Hæstiréttur sneri þeim úrskurði við. Beðist er velvirðingar á að þessar upplýsingar vantaði.
