Sjö þingmenn hafa nú lagt fram frumvarp um að sala á áfengi verði leyfð í sérverslunum einkaaðila. Þorsteinn Víglundsson, fyrrverandi félagsmálaráðherra, stendur fyrir frumvarpinu ásamt sex öðrum þingmönnum Viðreisnar, Pírata og Sjálfstæðisflokks.

Þetta er nú í fimmta sinn sem frumvarpið er lagt fram og hljóta kjósendur að fara taka slíkum áætlunum með fyrirvara. Að minnsta kosti hvað Viðreisn og Sjálfstæðisflokk varðar.

Þessir tveir flokkar mynduðu hryggjarstykkið í hinni skammlífu stjórn sem sat árið 2017 en með þeim dansaði Björt framtíð sem einnig vildi vín í búðir. Ef full alvara væri á bak við þetta þá hefði þetta raungerst fyrir ári.

Staðreyndin er sú að mikill meirihluti þjóðarinnar er á móti því að áfengi verði selt í búðum og því ekki til vinsælda að láta reyna á þetta fyrir alvöru. Ætla mætti að frumvarpið sé aðeins sett fram til að flagga meintu frjálslyndi í tilraun til að laða að yngri kjósendur.