Erla Kolbrún Óskarsdóttir og eiginmaður hennar eignuðust sitt annað barn árið 2010, þegar Erla var í námi í lyfjatækni. Eftir fæðinguna fór hins vegar að bera á miklu endaþarmsigi, eftirkvilla sem er algengur hjá konum eftir barnsburð. Erla Kolbrún gat farið á Landspítalann í aðgerð, en biðlistinn var langur eða tvö ár. Henni var þá bent á lækni á Akranesi þar sem hún komst fljótt að. Þetta var árið 2012.

Eftir aðgerðina varð Erla strax alvarlega veik og missti oft meðvitund af kvölum. Skömmu síðar komu í ljós óafturkræfar taugaskemmdir sem valda stöðugum og óbærilegum kvölum. Erla fékk bætur enda orðin óvinnufær, en í opinberum skýrslum var málið skilgreint sem „vanræksla“ af hálfu læknisins en Erla segir að um sé að ræða læknamistök. Undanfarin sex ár hefur Erla verið undirlögð kvölum og illa getað sinnt dætrum sínum og alls engri vinnu.

Erla Kolbrún bugaðist undan ástandinu og reyndi tvisvar sjálfsvíg, „ég þráði ekkert heitar en að fá bara að sofna,“ sagði hún í viðtali við Lindu Blöndal í þættinum 21 á Hringbraut.

Með henni í viðtalinu var Fríða Rut Heimisdóttir sem stýrir söfnun svo Erla komist til Bandaríkjanna í aðgerð sem gæti orðið til þess að Erla endurheimti heilsu sína.

Safna þarf um 2 milljónum króna og á Facebook-síðu söfnunarinnar má fá allar upplýsingar.

DV hefur áður fjallað um Erlu Kolbrúnu og og veikindi hennar og söfnunina, meðal annars hér.

Horfa má á þáttinn í heild sinni hér.