Hildur Eir Bolladóttir, prestur í Akureyrarkirkju og umsjónarmaður þáttarins Milli himins og jarðar á N4, hefur vakið athygli fyrir einlæga pistla sína á hildureir.is.
Í einum þeirra skrifar hún 10 reglur á Facebook og mættu sem flestir tileinka sér viðkomandi reglur.
10 reglur á Facebook:
- Ef þú hefur ekki húmor þá er líklega betra að vera á Instagram en Facebook.
- Ekki taka færslu annarra í gíslingu. Ef þér finnst einhver færsla alveg rosalega fyndin þá er oft nóg að læka eða setja broskall nema þú þekkir viðkomandi það vel að þú getir skotið á hann, vitandi hvar mörkin liggja.
- Oft er gott að lesa færslur, alveg til enda.
- Ekki tala um eiganda færslunnar í þriðju persónu á hans eigin þræði, það er hrikalega krípí.
- Stundum er gott að skoða hvort líkur séu á að eigandi færslunnar muni einhvern tíma eiga samleið með manni í skoðunum áður en lyklaborðið er mundað, stundum veit maður að gildismat er svo ólíkt að rökræður verða bara eins og að klóra sér í exemi.
- Stundum má skrolla niður fréttaveitu án þess að kommenta.
- Það eru allar líkur á því að þú munir einhvern tíma mæta þeim sem þú ræðir við á Facebook í holdi og blóði, við búum nefnilega á eyju.
- Ekki vanda um fyrir öðru fullorðnu fólki á Facebook, það er eins og að lána viðkomandi gyllinæð.
- Ekki móðgast ef fólk svarar þér af festu, þýðir nefnilega að það tekur mark á þér.
- Láttu þér þykja vænt um fólk áður en þú kommentar, það þýðir að þú getur bæði leyft þér að vera fyndinn og beittur án þess að meiða.
