Gengi krónunnar fellur nú ört. Á þessu eru varla neinar skýringar – aðrar en þær að Seðlabankinn sé að leyfa krónunni að falla. Krónan hefur veikst um sirka 6 prósent þegar þetta er skrifað.
Gengisfelling hét það í gamla daga og gekk yfir með reglulegu millibili. Þóttu stóratburðir og höfðu í för með sér gríðarlegt hamstur á hlutum sem fólk vissi að myndu hækka í verði.
Allt frá sígarettum til frystikista.
Nú er það kannski frekar kallað gengissig. Við erum svo vön þessu að það þykir máski ekkert tiltökumál.
Evran er komin í 131 krónu þegar þetta er skrifað en bandaríkjadalur í 113.
Til samanburðar má geta þess að í byrjun þessa mánaðar var evran 124 krónur en dollarinn 107.
Spurning hvort þessi þróun fær svo að halda áfram – útflutningsgreinarnar og ferðaþjónustan eru sjálfsagt til í það. En það sem við kaupum frá útlöndum verður dýrara og neytendur eru kannski ekki ýkja hrifnir af því. Því gengisfellingar fara beint út í verðlagið eins og við þekkjum vel.