Nú er beðið í ofvæni eftir næsta mánudagskvöldi en þá er lokaþáttur Næturvarðarins á dagskrá RÚV. Þættirnir hafa ekki bara glatt mann heldur fyllt lífið af spennu, sem stundum hefur komist nálægt því að vera óbærileg. Næturvörðurinn Pine er með áætlun sem fella á illmennið Roper og hyski hans, en hver hún nákvæmlega er kemur í ljós næsta mánudagskvöld. Nú, áður en lokauppgjörið rennur upp, er manni ekki alveg rótt og hefur áhyggjur af helstu persónum, ekki síst hinni fögru Jade, ástkonu Ropers. Hann væri vís með að láta drepa hana komist hann að því að hún hefur svikið hann.
Það er upplifun að horfa á þætti eins og þennan þar sem persónur lifna á skjánum. Helstu leikarar þáttanna voru tilnefndir til Emmy-verðlauna en þar gleymdist að tilnefna Elizabeth Debicki sem er mögnuð í hlutverki Jade. Í byrjun birtist Jade okkur sem yfirborðsleg og vitgrönn glamúrpía en smám saman fengum við nýja sýn á hana og í ljós kom að hún er hjartahlý, hugrökk og snjöll en um leið mjög dularfull. Það er viðkvæmni og depurð í fari hennar sem snertir mann. Tom Hiddleston smellpassar í hlutverk næturvarðarins sem tekur persónuleikabreytingum um leið og hann verður njósnari og fremur morð einfaldlega vegna þess að það er nauðsynlegt ætli hann að fletta ofan af vopnasmyglaranum Roper. Samleikur Hiddleston og Debicki er heillandi og maður skynjar afar vel þá erótísku strauma sem eru á milli þeirra. Reyndar er maður alveg undrandi að hinn illi Roper skuli ekki enn hafa áttað sig á hinu eldheita sambandi þeirra, en hann er auðvitað með hugann við að gera heiminn enn verri með vopnasölu sinni.
Hugh Laurie er stórkostlegt illmenni, sem skýtur manni skelk í bringu með augnaráði og raddblæ sem virðist stöðugt boða yfirvofandi ógn. Samleikur hans og Hiddleston er spennuþrunginn og maður á alltaf von á ofsafengnu uppgjöri. Það hlýtur að eiga sér stað í lokaþættinum.
Þar sem maður er gamaldags og allt of rómantískur vonar maður að illa fari fyrir Roper og Jade og Pine fái að eiga framtíð saman. Sennilega eru það óraunhæfar væntingar.
