Ástralska söngkonan Kylie Minogue og breski leikarinn Joshua Sasse opinberuðu trúlofun sína fyrr á þessu ári. Þau hafa lýst því yfir að þau muni ekki ganga í hjónaband fyrr en lög um hjónaband samkynhneigðra verði samþykkt í Ástralíu. Kosning þess efnis fer fram þar í landi i febrúar á næsta ári. Kylie er ekki þekkt fyrir pólitísk afskipti en hún á fjölda aðdáenda meðal samkynhneigðra og vill standa með þeim, eins og þeir hafa staðið með henni í gegnum árin. Unnustinn er jafn ákveðinn talsmaður samkynhneigðra og hún og segir að sér finnist óskiljanlegt að fólki í Ástralíu sé meinað að ganga í hjónaband vegna kynhneigðar sinnar.
Kylie er 48 ára og hefur aldrei gengið í hjónaband. Unnusti hennar er mun yngri, 28 ára gamall. Nú er hjónabandsmál þeirra í höndum ástralskra kjósenda.
