Fimm innflutningsfyrirtæki hafa stefnt íslenska ríkinu til endurgreiðslu á ofteknum sköttum í formi tolla á landbúnaðarvörur. Kröfurnar eru upp á um þrjá milljarða, en um milljarður bætist við vegna vaxta og dráttarvaxta. Þetta kemur fram í Fréttablaðinu.
Lögmaður Félags atvinnurekenda, Páll Rúnar M. Kristjánsson rekur málið, en hann hefur í þrígang höfðað álíka mál fyrir hönd félagsmanna FA vegna útboðsgjalda sem ríkið lagði á viðkomandi vegna úthlutunar á tollfrjálsum innflutningskvótum búvara. Vegna þeirra málaferla hefur ríkið þurft að endurgreiða um þrjá milljarða króna.
Bitbeinið að þessu sinni er svipað að sögn Páls, að tollarnir teljist sem skattar, samkvæmt hugtakinu eins og það birtist í stjórnarskrá. Því geti það ekki verið „val ráðherra hvort skattar eru lagðir á eða ekki.“
Hann segir einnig að verði valkvæðar heimildir til skatttöku festar í lög, yrðu lagalegar afleiðingar þær að gjaldtakan yrði ólögmæt í heild sinni.
Páll Rúnar vonast til að niðurstaða fáist í Héraðsdómi Reykjavíkur fyrir áramót.
„Það er knýjandi þörf á að endurskoða landbúnaðarkerfið og það á enginn að vera hræddur við það. Það er hægt að styrkja bændur með öðrum hætti en að vernda þá með tollmúrum. Verndartollar eru gamaldags nálgun að því hvernig hægt er að byggja þetta kerfi upp. Við trúum því að opinn og frjáls markaður sé af hinu góða. Það þarf að fara í markvissari stuðning við bændur. Það verður fróðlegt að sjá hvernig ríkisstjórnin tekur á þessum málum.“
segir Þorgerður Katrín Gunnarsdóttir, formaður Viðreisnar.
Ólafur Stephensen, framkvæmdarstjóri Félags atvinnurekenda tekur í sama streng:
„Sé það yfirhöfuð réttlætanlegt að vernda innlenda framleiðslu með tollum þá verður sú framleiðsla að standa undir eftirspurn. Hér eru lagðir tollar á fjölmargar tegundir matvæla sem eru ekki einu sinni framleidd á Íslandi. Það verður að spyrja hvaða hagsmuni verið sé að vernda með því.“
