https://www.facebook.com/www.dv.is/videos/508943189589748/

Klukkan tíu í morgun hófst málþingið sem ber yfirskriftina Allsgáð æska og stendur það yfir til klukkan 12. Fer málþingið fram í Veröld, húsi Stofnunar Vigdísar Finnbogadóttur. Verður sérstaklega höfðað til foreldra ungmenna og þeim sem hafa áhuga á forvörnum.

Ástæðurnar fyrir því að unglingar leita í fíkniefni eru margar. Fíkniefni þykja spennandi af því að þau eru ólögleg, unglingar sjá þeim hampað í tónlistarmyndböndum og bíómyndum og þrýstingur frá vinum skiptir einnig máli. Margir kljást við kvíða eða aðra andlega kvilla og unglingarnir kynna fíkniefni fyrir hver öðrum sem lausn.

Guðrún Ágústsdóttir mun flytja erindi fyrir hönd Foreldrahúss Vímulausrar æsku en hún segir í samtali við DV:

„Við höfum séð mikla aukningu í notkun lyfseðilsskyldra lyfja á undanförnum tveimur eða þremur árum. Þau taka til dæmis oxycontín-töflur eða parkódín forte, eða reykja þetta og kenna hvert öðru að „lækna“ sig. Aðgengið að efnunum er orðið mjög mikið með tilkomu netsins. Áður fyrr þurfti fólk að vera tengt og hafa svolítið fyrir því að útvega sér efni, en núna er ekki nauðsynlegt að þekkja neinn. Unglingar sem kaupa sér fíkniefni á netinu vita heldur ekkert hvað þeir eru að fá og hvað þeir eiga að gera. Þeir telja sér hins vegar trú um að þeir hafi stjórn á neyslunni og aðstæðunum.“

Sigrún Vatnsdal kemur einnig að málþinginu en hún segir: „Það er mikilvægt að foreldrarnir leiti sér aðstoðar. Þeir finna fyrir kvíða, áhyggjum, sektarkennd, sorg og reiði, bæði út í sjálfa sig og unglinginn. Þeir upplifa sig hjálparlausa og finnst þeir hafa brugðist sem foreldri.“

Málþingið fer fram klukkan 10 til 12, laugardaginn 1. september. Guðrún Ágústsdóttir mun flytja erindi fyrir hönd Foreldrahúss Vímulausrar æsku. Einnig tala fulltrúar frá SÁÁ, IOGT á Íslandi, MST teymi Barnaverndarstofu og Minningarsjóði Einars Darra.

Opið verður fyrir fyrirspurnir og umræður eftir hvert erindi. Auk þess mun Saga Nazari, sem sjálf átti við fíknivanda að stríða, flytja tónlist.