Sanna Magdalena Mörtudóttir, oddviti Sósíalista í Reykjavík, segir það óásættanlegt að leiguverð Félagsbústaða hækki um 7% til viðbótar á árinu til að tryggja jafnvægi í sjóðsstreymi samkvæmt árshlutareikningi Reykjavíkurborgar.

Hún segir leigjendur innan Félagsbústaða þegar komna að þolmörkum:

„Í árshlutareikningi kemur fram að hækka þurfi leiguverð hjá Félagsbústöðum um 7% til viðbótar á árinu til að tryggja jafnvægi í sjóðstreymi árin 2018 og 2019 m.v. að verðbólguforsendur fjárhagsáætlunar standist. Samkvæmt frekari útskýringum er átt við 2% hækkun að auki við þá 5% hækkun á leiguverði sem hefur nýlega átt sér stað. Hlutverk Félagsbústaða er að leigja til tekjulágra einstaklinga og fjölskyldna sem ekki geta staðið undir greiðslubyrði lána vegna íbúðakaupa og eiga ekki kost á leiguhúsnæði á viðráðanlegum kjörum. Leigjendur innan Félagsbústaða eru nú þegar komin að þolmörkum hvað varðar leigugreiðslur. Óásættanlegt er að viðkvæmur hópur almennings sé látin standa undir slíkri hækkun. Í árshlutareikningi kemur einnig fram að útgjöld vegna langtímaveikinda námu alls um 357 mkr í grunnskólum, leikskólum og frístund og að gjaldfærð langtímaforföll í grunnskólum og leikskólum séu samtals 62 mkr umfram fjárheimildir á tímabilinu. Draga má þá ályktun að mikið álag sé á starfsfólkinu í þessum störfum og geta langtímaforföll m.a. átt sér stað vegna útkeyrslu og kulnunar í starfi. Þar er deginum ljósara að hækka þarf lág laun á þessum starfsvettvangi, til að draga úr manneklu og álagi á starfsfólkið.“