Victor Lindelof, varnarmaður Manchester United, hefur ekki þótt standa undir væntingum á Old Trafford.

Þessi 24 ára gamli leikmaður var í erfiðleikum á mánudaginn eftir að hafa komið inná í 3-0 tapi United gegn Tottenham.

Sven Goran Eriksson, landi Lindelof, segir að Jose Mourinho, stjóri United, verði að koma leikmanninum til varnar.

,,Ég verð að segja það að hann gerði tvö stór mistök í síðasta leik og hann var heppinn að komast upp með það,” sagði Eriksson.

,,Þú býst hins vegar ekki við því af honum. Við erum að tala um mjög góðan fótboltamann.”

,,Hann hefur verið frábær fyrir sænska landsliðið sem komst í 8-liða úrslit HM. Hann var mikilvægur í undankeppninni og er frábær leikmaður, það er ekki hægt að efast um það.”

,,Lífið er erfitt þegar þú liggur undir gagnrýni sem leikmaður eða þjálfari. Þú verður að koma til baka. Ef þjálfarinn er hins vegar ekki að verja þig þá er lífið miklu, miklu erfiðara.”

,,Nú tala ég aðeins um mig, í öllum þeim liðum sem ég hef verið hjá, þá verður þú að koma leikmönnum til varnar.”