„Ef þú sérð ofbeldi stöðvaðu það. Öryggi barna byrjar með þér,“ er yfirskrift ráðstefnu sem samtökin Blátt áfram standa fyrir á Hótel Natura Nauthólsvegi á föstudaginn. Á ráðstefnunni talar fjöldi merkra íslenskra og erlendra fyrirlesara sem hafa sérhæft sig í þessum málaflokki. Fyrsta erindið er flutt af Sigríði Björnsdóttur, framkvæmdastjóra Blátt áfram, og frumsýnir hún einnig nýtt kennsluefni sem samtökin hafa unnið að síðustu misseri. Efnið ber heitið Verndarar.

Fundarstjóri er Bergur Þór Ingólfsson en meðal fróðlegra erinda er „Börn sem sýna óviðeigandi kynhegðun. Er hægt að grípa inn í?“ eftir Önnu Kristínu Newton, sálfræðing. Jane Flieshman, sérfræðingur í kynhneigð fjallar um heilbrigða þróun kynvitundar hjá börnum og Kieran McCartan, doktor í sálfræði og prófessor í afbrotafræði fjallar um forvarnir gegn kynferðisbrotum og lýðheilsu.

Fjölmörg forvitnilega erindi um þennan viðkvæma og mikilvæga málaflokk verða haldin. Dagskráin hefst kl. 8 á föstudagsmorguninn að Hótel Natura og lýkur kl. 15:15.

Nánari upplýsingar eru á Facebook-síðu viðburðarins.