Stjórn N1 hf hefur boðað til hluthafafundar þriðjudaginn 25. september næstkomandi. Sem kunnugt er gerði Samkeppniseftirlitið sátt við N1 vegna samruna þess við Festi, sem rekur Krónuna, Nóatún og  ELKO meðal annars.

Á dagskrá hluthafafundarins hjá N1 hf. stendur til að skipta um nafn, líkt og sjá má á dagskránni:

1. Stjórnarkjör.
2. Tillaga að nýrri starfskjarastefnu félagsins.
3. Tillaga að reglum um tilnefningarnefnd í starfsreglum stjórnar.
4. Tillaga að nýrri samkeppnisstefnu félagsins.
5. Tillaga að nýju nafni N1 hf.
6. Önnur mál.

Samkvæmt lýsingu sem N1 gaf út vegna hlutafjárhækkunar, mun nafn móðurfélagsins breytast úr N1 í Festi. Þá mun hið keypta félag, Festi, breytast í Nesti. Hið sameinaða félag er um fimm rekstrarfélög: N1, Krónuna, Elko, Festi fasteignir og Bakka vöruhótel. Eignarhaldið á fjórum síðastnefndu félögunum verður í gegnum eignarhaldsfélagið Nesti.

Forstjóri samstæðunnar verður Eggert Þór Kristófersson, sem tók við starfi forstjóra N1 árið 2015.

N1 merkið varð til við sameiningu olíufélagsins Esso og Bílanausts árið 2007.

„Nafnið er einfalt og skemmtilegt og hentar vel fyrir félag sem ætlar að sækja fram með nýjar hugmyndir og nýjar áherslur. Við erum ekki lengur olíufélag, heldur alhliða verslunar- og þjónustufyrirtæki,“

sagði Hermann Guðmundsson þáverandi forstjóri, í tilefni af nýja nafninu.