Síðdegisútvarp Rásar tvö leitar nú logandi ljósi að 6 Íslendingum sem sendir voru á vegum Vísis til Ibiza árið 1998. Tilgangur ferðarinnar var að búa til raunveruleikaþáttinn Hita 98 en í þáttunum gafst lesendum Vísis og hlustendum FM957 tækifæri til að fylgjast með örlögum 6 ungra Íslendinga á eyjunni. Athygli vekur að ein þeirra sem tók þátt í þættinum er athafnakonan Margrét Friðriksdóttir.
„Frá og með næsta mánudegi gefst þjóðinni tækifæri á að fylgjast með ævintýrum sex ungmenna í djammparadísinni Ibiza. Krakkarnir sem voru valdir í ferðina sem ber yfirskriftina Hiti ’98, þekkjast ekkert en munu eflaust kynnast vel þær tvær vikur sem þau dvelja úti,“ svona hljómar umfjöllun um þáttinn sem birtist í Fókus þann 21. ágúst árið 1998.
Í samtali við DV segir Margrét ferðina hafa verið mjög skemmtilega. „Þetta var bara ein af mínum skemmtilegustu upplifunum og bara rosalega skemmtilegt,“ segir Margrét. Aðspurð segir hún ferðina að mestu hafa snúist um að fara út að skemmta sér. „Við vorum auðvitað rosalega ung og við vorum aðallega að djamma og hafa gaman. Ég var reyndar rænd fyrsta kvöldið og símanum mínum stolið en að öðru leyti var þetta frábær ferð.“
Margrét segir að ástin hafi aldrei verið langt frá hópnum þó svo að hún sjálf hafi ekki fundið ástina í ferðinni. „Það myndaðist allaveganna eitt par í ferðinni og ég held að þau hafi síðar eignast barn,“ segir hún.
Í umfjöllun Fókus fengu lesendur að kynnast þátttakendum en á þessum tíma starfaði Margrét á sólbaðsstofunni Gullsól. Í kynningunni kom meðal annars fram að Margrét væri mest til í að festast í lyftu með Brad Pitt. Þá sagði hún skemmtistaðinn Astró vera bestan til þess fallinn að finna sér félaga.
Ásamt Margréti fóru þau Sigurbjörn Jónsson, Kolbrún Þorkelsdóttir, Gunnhildur Sara Gunnarsdóttir, Ríkharður S Ríkharðsson og Svavar Hörður Heimisson á eyjuna fögru í suðri. Eins og áður segir leitar dagskrágerðarfólk Rásar Tvö eftir því að ná tali af þátttakendum í þættinum og hafa óskað eftir hjálp við að hafa uppi á fólkinu. „Nú leitum við til ykkar. Þekkir einhver þetta fólk? Ef svo er þá endilega sendið okkur skilaboð,“ segir í auglýsingu á Facebook-síðu þáttarins.
