Einar Bárðarson, oft kallaður umboðsmaður Íslands, hvetur fólk til að sýna auðmýkt og þakklæti. Tilefnið er ólíkt gengi tveggja knattspyrnuliða sem eiga ófáa stuðningsmenn hér á landi, Liverpool og Manchester United.

Einar er sjálfur gallharður stuðningsmaður Liverpool en liðið hefur farið frábærlega af stað í ensku úrvalsdeildinni í vetur. Liðið er á toppi deildarinnar með fullt hús stiga eftir þrjár umferðir og eru margir sem spá því að Liverpool verði í harðri baráttu við Manchester City um Englandsmeistaratitilinn.

Á sama tíma er gengi Manchester United ekkert til að hrópa húrra yfir. Liðið hefur tapað tveimur leikjum í röð, síðast 3-0 á heimavelli gegn Tottenham í gærkvöldi. Liðið tapaði um helgina 3-2 gegn Brighton og er óhætt að segja að krísa sé á Old Trafford um þessar mundir. Liðið er í neðri hluta deildarinnar með 3 stig eftir 3 umferðir.

Rígurinn á milli þessara sögufrægu félaga er mikill og þreytast stuðningsmenn liðanna seint á að monta sig ef vel gengur og strá salti í sárin ef illa gengur.

Einar hvetur stuðningsmenn Liverpool hins vegar til að hafa sig hæga.

„Sem Liverpool maður til 40 ára þá hefði ég vanist því síðustu ár að tala varlega. Láta lítið fyrir mér fara og vera ekki að ganntast með ófarir annarra liða. Vera semsagt lítillátur og þakklátur fyrir það sem maður fær og það sýnist mér flestir „púlarar“ hafa tamið sér. Einn sigur og þá láta menn duga pent „YNWA“ í gluggann hjá sér,“ segir Einar og bætir við að hann hafi orðið var við það að margir úr röðum stuðningsmanna Liverpool hafi sýnt fullmikinn hroka.

„Nú er öldin önnur og margir úr okkar röðum með háreysti og hroka og svona gamla MAN U takta. Ég kann ekkert sérstaklega vel við þetta nýja stef okkar í okkar auðmýkja fögnuði. Ég vil bara að við höldum áfram að vera hógværir og þakklátir áhangendur. YNWA. Er ég einn um þetta?“ spyr Einar að lokum.