Poldark verður betri með hverri vikunni. Síðasti þáttur var nokkuð magnaður og mjög viðburðaríkur. Þar sást Francis, frændi Poldarks og eiginmaður Elísabetar, berjast fyrir lífi sínu í vatni. Maður var að vona að Poldark kæmi á vettvang og bjargaði honum á síðustu stundu. En þar sem gömul kona hafði nokkru áður lagt spil og séð í þeim yfirvofandi harmleik átti maður fremur von á að Francis myndi deyja. Þannig fór og Elísabet grét í örmum Poldarks, fyrrverandi unnusta síns sem hún hefur aldrei hætt að elska. Sennilega mun hún jafna sig tiltölulega fljótt á sviplegum dauða eiginmanns síns. Allavega virðist ljóst að Demelza, eiginkona Poldarks, hafi ástæðu til að hafa áhyggjur því sitthvað er í gangi milli Poldarks og Elísabetar.

Nýjar persónur hafa nýlega mætt til leiks í Poldark. Ein þeirra er rík og falleg aðalskona. Hún virtist við fyrstu kynni vera kaldlynd og útsmogin en þar var ekki allt sem sýndist. Hún kynntist góðum og fátækum lækni og þau elska hvort annað. Maður vonar að þar fari allt vel, en veit um leið að engu er hægt að treysta í þeim efnum.

Poldark mun halda áfram að gleðja okkur um sinn. Fátt jafnast á við gott búningadrama þar sem í gangi eru heitar ástir, miklar tilfinningar og barátta við illa þenkjandi fólk. Ýmislegt bendir til að hagur Poldarks sé að vænkast og vonandi mun hann um leið átta sig á því hversu mikla gersemi hann á í konu sinni. Elísabet er ágæt, en Demelza er enn merkilegri manneskja. Hún á ekki skilið að eiga eiginmann sem er með hugann við aðra konu. Poldark verður að átta sig!