Fjármála- og efnahagsráðuneytið hefur í bígerð að heimila útgáfu ríkisskuldabréfa með yfir 25 ára lánstíma. Hefur ráðuneytið birt drög að frumvarpi þess efnis að fella úr gildi ákvæði laga sem tilgreina að ríkisskuldabréf skuli ekki gefa út til lengri tíma en 25 ára.

Í greinargerð frumvarpsins er slík leið sögð ákjósanlegur kostur fyrir fjárfesta með langtímaskuldbindingar, líkt og lífeyrissjóði. Þá er breytingin sögð gera ríkissjóði kleift að að kanna hvort tryggja megi að lánsfjárþörf og skuldbindingum hans sé mætt við lægri tilkostnað en áður. Verði það raunin, megi reikna með að vaxtagjöld ríkissjóða lækki og hann nái markmiðum sínum um meðallánstíma:

„Útgáfa ríkisskuldabréfa til lengri tíma en 25 ára gæti stuðlað að hagkvæmari fjármögnun ríkissjóðs en tryggir hana ekki. Samfélagslegur ávinningur felst í því að mögulegt verði að tryggja hagkvæmari fjármögnun ríkissjóðs og lækka vaxtagjöld sjóðsins og búa þannig til svigrúm til lægri skatta eða aukinnar opinberrar þjónustu. Þyki útgáfa ríkisskuldabréfa til lengri tíma en 25 ára ekki líkleg til að tryggja hagkvæmari fjármögnun ríkissjóðs þá mun ríkissjóður ekki gefa út slík bréf. Breytingin ætti því ekki að hafa í för með sér neinn kostnað.“

Undirbúnings- og greiningarvinna frumvarpsins var gerð í samstarfi við Seðlabanka Íslands.