Það sem átti að vera skemmtilegt kvöld endaði heldur betur á annan veg hjá tveimur sænskum konum fyrr í sumar. Konurnar, sem eru um tvítugt, fóru út að skemmta sér á næturklúbbi í Brädangs sem er sunnan við Stokkhólm. Þegar leið á nóttina og klúbbnum var lokað kom upp ósætti þeirra á milli. Á lestarstöðinni í Brädangs færðist enn meiri hiti í málin og þær fóru að hrinda hvor annarri. Þetta endaði síðan með að önnur konan dró hina á hárinu út á lestarteinana rétt áður en lest átti að koma á stöðina.

Aftonbladet skýrir frá þessu.

„Ég hélt að ég myndi deyja.“

Sagði fórnarlambið í samtali við blaðið.

Þetta gerðist aðfaranótt 26. júní. Þegar konurnar voru farnar að hrinda hvor annarri missti önnur þeirra skyndilega alla stjórn á sér.

„Hún hélt að ég ætlaði heim með strák og síðan grét hún og öskraði og reif í handlegginn á mér.“

Sagði fórnarlambið. Síðan héldu átök þeirra áfram og enduðu eins og fyrr segir með að hin konan dró þessa niður á lestarteinana og hélt henni þar. Fórnarlambið öskraði á hjálp og komu aðrir farþegar henni þá til bjargar og komu báðum konunum af teinunum.

Málið verður tekið fyrir í rétti í Södertörn í þessari viku. Konan er ákærð fyrir alvarlega líkamsárás.