Aldrei hafa fleiri búið í Færeyjum en nú. Í júlí fór íbúafjöldinn í fyrsta sinn upp fyrir 51.000. Meðal þeirra breytinga sem hafa ýtt undir þessa fólksfjölgun er að þeim fer fækkandi sem flytja til Danmerkur til að stunda nám. 2011 var hlutfall ungra Færeyinga, sem stunduðu nám heima, 36 prósent af heildinni en er í dag 43 prósent.

Á síðasta ári var hagvöxturinn í Færeyjum fimm prósent en efnahagslegur uppgangur hófst þar 2013 og stendur enn í miklum blóma. Atvinnuleysi mælist nú 2,1 prósent og hefur dregist mikið saman undanfarin ár.

Samkvæmt frétt Danska ríkisútvarpsins þá á fólksfjölgunin einnig rætur að rekja til fleiri fæðinga og að fleiri flytjast til eyjanna en áður.