Bandaríski stjórnmálamaðurinn John McCain er látinn eftir baráttu við krabbamein. McCain, sem var 81 árs þegar hann lést, var þingmaður Arizona til fjöldamargra ára og þá barðist hann um forsetastólinn við Barack Obama í kosningunum 2008.
McCain lést í gær, umvafinn fjölskyldu sinni að því er segir í tilkynningu frá aðstandendum hans.
John McCain naut mikillar virðingar hjá stórum hópi fólks, ekki síst vegna staðfestu sinnar við að fylgja eigin sannfæringu. Hann hefur ekki legið á skoðunum sínum um Donald Trump Bandaríkjaforseta til dæmis.
Áður en pólitískur ferill hans fór af stað var hann stríðsfangi í fimm og hálft ár í Víetnam en hann var tekinn höndum eftir að flugvél hans var skotin niður.
Þegar honum var boðið að vera látinn laus úr haldi hafnaði hann því og krafðist þess að þeir stríðsfangar sem höfðu verið lengst í haldi skyldu látnir lausir fyrst.
Hann var forsetaframbjóðandi repúblikana 2008 og barðist um forsetastólinn við Barack Obama sem sigraði eins og kunnugt er. Eftir að McCain greindist með illkynja heilaæxli í fyrrasumar sendi Obama honum einmitt kveðju á Twitter:
„John McCain er bandarísk hetja og einn sá hugrakkasti baráttumaður sem ég hef nokkru sinni hitt. Krabbameinið veit ekki við hvern það er að berjast. Give it hell, John.“
