Lou Macari, fyrrum leikmaður Manchester United, er ekki hrifinn af viðhorfi leikmanna í nútíma fótbolta.

Macari lék með United frá 1973 til 1984 og var einnig partur af skoska landsliðinu. Hann lék 329 leiki fyrir United.

Macari segir að ein af ástæðum þess að Sir Alex Ferguson ákvað að stíga til hliðar árið 2013 sé að það sé allt annað að höndla leikmenn í dag.

,,Það eru of margir leikmenn sem virðast ekki gera sitt þegar útlitið er svart. Það kemur ekki á óvart að stuðningsmenn United séu komnir með nóg af sumum leikmönnum,“ sagði Macari.

,,Það er að verða erfiðara og erfiðara að hafa stjórn á leikmönnum. Á svona tímum þarftu sterka karaktera í búningsklefanum. Hvar eru þeir?“

,,Ég held að ein af ástæðum þess að Sir Alex Ferguson hafi hætt er vegna þess að viðhorf leikmanna er að breytast og hefur breyst undanfarin ár.“

,,Sumir leikmenn hefðu leitað til hans til að fá leiðsögn en í dag þá fara þeir annað, yfirleitt leita þeir til umboðsmanna.“