Alls voru 1,044 fóstureyðingar framkvæmdar hér á landi árið 2017, samkvæmt tölum frá Landlæknisembættinu. Morgunblaðið greinir frá. Það eru 23 fleiri en árið á undan. Er þetta í annað sinn sem fóstureyðingar hér á landi fara yfir 1000 á einu ári.

Alls fóru 552 konur í fóstureyðingu, flestar á aldrinum 20-29 ára. Alls 57% þeirra voru ekki í sambúð en um 43% voru giftar eða í sambúð.

Uppgefnar forsendur fyrir fóstureyðingu var í langflestum tilfellum sagðar félagslegar, eða í 1,007 tilfellum. Þá voru ástæðurnar sagðar læknisfræðilegar í 36 tilfellum og eitt tilfelli var ótilgreint.

Flestar konur fara í fóstureyðingu þar sem notast er við lyfjagjöf, eða 786, en 257 fóru í aðgerð. Fram að árinu 2003 voru flestar fóstureyðingar framkvæmdar með aðgerð, en fóstureyðing með lyfjagjöf hefur stórfjölgað síðan þá.

Af þeim 1,044 konum sem fóru í fóstureyðingu í fyrra höfðu alls 244 farið áður í fóstureyðingu. Alls 84 konur höfðu farið tvisvar og 48 konur höfðu farið þrisvar sinnum.

Alls 845 konur voru gengnar minna en níu vikur, 147 höfðu gengið 9-12 vikur, 37 konur voru gengnar 13-16 vikur, fjórar konur voru komnar á 17-20 viku, og níu voru gengnar yfir 20 vikur.

Alls 542 karlar fóru í ófrjósemisaðgerð á síðasta ári, svonefnda herraklippingu.

Alls 96 konur gengust undir ófrjósemisaðgerð. Aðgerðum karla hefur fjölgað á síðustu árum, meðan aðgerðum hjá konum hefur fækkað.