Guðmundur Ellert Björnsson, starfsmaður Barnaverndar Reykjavíkur, hefur óskað eftir því að fá að snúa aftur til starfa. Þessu er haldið fram í Fréttablaðinu. Guðmundur var á dögunum sýknaður af ákæru um kynferðisbrot gegn fjórum börnum og einum andlega fötluðum manni.
Fréttablaðið greinir frá þessu. Regína Ásvaldsdóttir, sviðsstjóri velferðarsviðs Reykjavíkurborgar, segir í samtali við blaðið að hann hafi verið í tímabundu leyfi frá störfum. „Þegar niðurstaða liggur fyrir er tekin ákvörðun um framhald máls. Velferðarsvið leggur mikla áherslu á að það ríki traust í garð starfsmanna sem starfa á vegum sviðsins og að það sé hafið yfir allan vafa að öryggi barna og annarra einstaklinga sem dvelja á stofnunum sviðsins sé tryggt,“ segir Regína í samtali við Fréttablaðið.
Guðmundur Ellert var sakaður um að hafa brotið gegn fjórum börnum og einhverfum manni. Guðmundur Ellert var sakaður um að hafa í fjölmörg skipti á tímabilinu 1998 til 2004 eða 2005, brotið á pilti sem þá var sex til tólf ára gamall. Hann var ákærður fyrir að hafa í fjölmörg skipti á tímabilinu 2004-2010 brotið á öðrum pilti sem þá var sjö til þrettán ára.
Þá var Guðmundur Ellert sakaður um að hafa í eitt skipti, á tímabilinu 2005 til 2008, nauðgað stúlku sem þá var sjö til tíu ára. Auk þess var hann ákærður fyrir að hafa brotið á pilti sem þá var þrettán eða fjórtán ára, á árunum 2002 eða 2003.
Dómari í málinu, Bergþóra Ingólfsdóttir, mat það svo að ákæruvaldinu hefði ekki tekist að sanna nægilega vel sekt Guðmundar í öllum ákærunum. Í dómnum kemur fram að þrír ákæranda Guðmundar deildu rúmi með honum. Talsmaður meintra þolenda sögðu á dögunum í samtali við DV að sýknunin hafi verið áfall fyrir þau. Þau töldu að réttarkerfið hafi brugðist þeim. Hefur málinu verið áfrýjað til Hæstaréttar.
