Það væri synd að missa af stórskemmtilegum sumarsýningum í Duus Safnahúsum sem lýkur nú á sunnudag. Í Listasal, Bíósal og Stofu eru sýningar úr safneign Listasafns Reykjanesbæjar eftir tæplega 60 listamenn. Safnið fagnar 15 ára afmæli í ár og hafa flest verkanna sem sýnd eru borist safninu á þessu tímabili.

Í aðal sýningarsal safnsins, Listasal, eru verk af margvíslegu tagi svo sem olíuverk, vatnslitamyndir og skúlptúrar eftir hina ýmsu listamenn en þó fyrst og fremst samtímamenn. Í Bíósal gefur að líta mannamyndir af ýmsu tagi og í Stofu er sýning helguð verkum eftir listmálarann Ástu Árnadóttur sem var afkastamikill vatnslitamálari en börn hennar færðu safninu veglega listaverkagjöf fyrir skemmstu. Sýningarstjóri allra sýninganna er Inga Þórey Jóhannsdóttir.

Í Gryfjunni gefur að líta mjög áhugaverða sýningu sem ber heitið „Hlustað á hafið“ en um er að ræða fyrstu sýningu nýs safnstjóra Byggðasafns Reykjanesbæjar, Eiríks Páls Jörundssonar, í sýningarhúsum bæjarins. Sýningin fjallar um náin tengsl sjómanna árabátatímans við sjóinn og fórnir þeirra við að ná í gull hafsins, sem öllu máli skipti fyrir lífsafkomuna.

Ókeypis aðgangur er á sýningarnar og Duus Safnahús eru opin alla daga frá kl. 12-17.