Síðasta vika Alþjóðlega orgelsumarsins hefst í dag og lofa aðstandendur hennar því að hátíðin muni enda með stæl. Organistinn Jónas Þórir mun spinna út frá verkum G. Gershwins með óvæntu útspili, vegleg dagskrá verður í Hallgrímskirkju á Menningarnótt (svokallaður Sálmafoss) og ein stærsta orgelstjarna sumarsins, Hannfried Lucke, mun enda hátíðina með fágaðri flugeldasýningu.
Hannfried Lucke organisti/prófessor í Mozarteum – Salzburg og Jónas Þórir:
Miðvikudaginn 15. ágúst kl. 12 syngur hinn margrómaði kammerkór Hallgrímskirkju, Schola cantorum, íslenskar og erlendar kórperlur eftir Jón Ásgeirsson, Jón Nordal, Sigvalda Kaldalóns, Händel, Byrd, Sigurð Sævarsson, Þorkel Sigurbjörnsson og Hjálmar H. Ragnarsson. Stjórnandi er Hörður Áskelsson.Tónleikagestum er boðið í kaffi og spjall við meðlimi kórsins að tónleikunum loknum. Miðaverð 2.500 kr.
Fimmtudaginn 16. ágúst kl. 12 leikur organisti Bústaðakirkju, Jónas Þórir Þórisson, frjálsa tónsmíð sem nefnist Rhapsodía og er spunnin út frá helstu verkum George Gershwins, m.a. Rhapsody in Blue. Miðaverð 2.000 kr.
Laugardaginn 18. ágúst frá kl. 15 – 21 verður vegleg tónlistardagskrá í boði, svokallaður Sálmafoss á Menningarnótt. Aðgangur ókeypis.
Sunnudaginn 19. ágúst kl. 17 leikur Hannfried Lucke, konsertorganisti og prófessor við Mozarteum-háskólann í Salzburg, verk eftir Bach (Fantasía og fúga í g-moll), Byrd, Liszt, Novák, Reger og Rachmaninov. Miðaverð kr. 2.500.
Fimmtudaginn 15. ágúst kl. 12: Schola cantorum, stjórnandi Hörður Áskelsson
Efnisskrá:
Vorvísa Texti: Halldór Laxness 1902‒1998
Músik: Jón Ásgeirsson *1928
Smávinir fagrir Texti: Jónas Hallgrímsson 1807‒1845
Músik: Jón Nordal *1926
Á Sprengisandi Texti: Grímur Thomsen 1820‒1896
Músik: Sigvaldi Kaldalóns 1881‒1946
Úts.: Jón Ásgeirsson
Dagur er nærri Kristján Valur Ingólfsson, *1947
Músik: George Fridrich Handel 1675‒1759
Ave Verum Corpus Texti: Latneskur hymni
Músik: Willian Byrd 1540‒1623
Nunc dimittis Texti: Luk. 2. 29–32
Músik: Sigurður Sævarsson *1963
Heyr, himna smiður Texti: Kolbeinn Tumason 1173–1208
Músik: Þorkell Sigurbjörnsson 1938–2013
Stóðum tvö í túni Texti: Þjóðvísa
Músík: Ísl. Þjóðlag
Úts.: Hjálmar H. Ragnarsson *1952
Grafskrift Texti: Þjóðvísa
Músík: Ísl. þjóðlag
Úts.: Hjálmar H. Ragnarsson
Schola cantorum, kammerkór Hallgrímskirkju, hefur frá upphafi hlotið mikla athygli fyrir fágaðan og tæran söng sinn. Kórinn var valinn „Tónlistarflytjandi ársins 2016” á Íslensku tónlistarverðlaununum í mars 2017 og hefur unnið til verðlauna í erlendum keppnum og komið fram á tónleikum í Noregi, Svíþjóð, Finnlandi, Ítalíu, Spáni, Þýskalandi, Frakklandi, Japan, Sviss og Bandaríkjunum. Schola cantorum var útnefndur Tónlistarhópur Reykjavíkurborgar 2006, tilnefndur til tónlistarverðlauna Norðurlandaráðs 2007 og Íslensku tónlistarverðlaunanna 2013. Kórinn hefur frá upphafi leikið mikilvægt hlutverk í íslensku tónlistarlífi og frumflutt verk eftir fjölda íslenskra tónskálda auk þess að flytja tónlist allra stíltímabila með og án hljóðfæraundirleiks, m.a. í samstarfi við Sinfóníuhljómsveit Íslands, Alþjóðlegu barokksveitina í Hallgrímskirkju (áður Den Haag), Björk, Sigurrós o.fl. Kórinn kom einnig fram á 5 tónleikum á tónlistarhátíðinni Reykjavík Festival í Walt Disney Hall í Los Angeles í apríl 2017, þ.s. söngur kórsins hlaut einróma lof í allri umfjöllun stórblaða svo sem New York Times, LA Times o.fl. Stjórnandi kórsins frá upphafi er Hörður Áskelsson.
Fimmtudaginn 16.ágúst kl. 12: Jónas Þórir Þórisson, organisti Bústaðakirkju
Efnisskrá:
Rhapsodía er heiti á frjálsri tónsmíð og eitt þekktasta tónverk George Gershwin er einmittRhapsody in Blue. Hér fáið þið að kynnast lögum og verkum eftir eitt af mínum uppáhaldstónskáldum 20. aldar, George Gershwin.
Ég mun spinna út frá hans þekktu tónsmíðum, m.a. úr Rhapsody in Blue og svo lögum úr óperunniPorgy og Bess og ef til vill kemur ein þekktasta söngkona Íslands og syngur með mér Summertime.
Meðal laga verða : The Man I love, Someone to Watch Over Me, I Got Plenty o‘ Nuttin‘, It ain‘t Necessarily So, I Got Rhythm og Summertime. JÞ
Jónas Þórir Jónasson (1956) byrjaði ungur að læra á fiðlu hjá Birni Ólafssyni konsertmeistara en orgelið og píanóið átti hug hans og hjarta. Hann lauk tónmenntakennaranámi og nam píanóleik hjá Halldóri Haraldssyni og tónsmíðar hjá Atla Heimi Sveinssyni. Jónas Þórir byrjaði að læra á orgel hjá Marteini H. Friðrikssyni og síðar hjá Herði Áskelssyni og Birni Steinari Sólbergssyni. Hann lauk kantorsprófi úr Tónskóla þjóðkirkjunnar og var við nám hjá Karsten Askeland í Bergen í Noregi. Jónas Þórir er mikilvirtur undirleikari hjá söngvurum og hefur einnig samið og útsett mikið. Hann starfar sem organisti í Bústaðakirkju.
Laugardaginn 18. ágúst kl. 12-21: Sálmafoss á Menningarnótt, fjölbreytt tónlistaratriði
Dagskrá:
Kl 15, 16, 17, 18 og 19 Sálmasöngur – allir syngi með!
Kl. 15.55, 16.55, 17.55, 18.55 og 19.55: Klukkuspil Hallgrímskirkju ómar.
Valin sálmalög send út í “Menningarnóttina”.
15.10 Sálmar á nýrri öld Kammerkórinn Schola cantorum undir stjórn Harðar Áskelssonar og Sigurður Flosason tónskáld og saxófónleikari kynna og flytja nýja sálma eftir Sigurð og Aðalstein Ásbergsson skáld. Sigurður rammar inn flutninginn með spuna á saxófón og spjalli.
16.10 Söngsveitin Fílharmónía flytur fjölbreytta kórtónlist undir stjórn Magnúsar Ragnarssonar.
16.40 Lára Bryndís Eggertsdóttir leikur sálmforleiki á Klais-orgelið.
17.10 Mótettukór Hallgrímskirkju syngur sálmaútsetningar og mótettur undir stjórn Harðar Áskelssonar.
17.30 Hannfried Lucke, konsertorganisti frá Salzburg, leikur á Klaisorgelið.
18.10 Umbra flytur Maríusöngva frá miðöldum og trúarleg þjóðlög, írsk sem íslensk.
18.35 Björn Steinar Sólbergsson organisti Hallgrímskirkju flytur fjölbreytta orgeltónlist.
19.10 Hildigunnur Einarsdóttir altsöngkona og Björn Steinar Sólbergsson flytja sálma og aríur eftir Bach og fl.
19.30 Sálmajass Sigurður Flosason saxófónleikari og Gunnar Gunnarsson orgelleikari flytja jassskotnar útsetningar af þekktum sálmum.
20.00 Rafspunadúettinn ManKan tengist midi-búnaði Klais-orgelsins.
20.30 Orgelspuni og sálmforleikir: Hannfried Lucke konsertorganisti frá Salzburg kemur Sálmafossgestum á óvart með fjölbreyttri túlkun á Klaisorgelið.
21.00 Klukkuspil Hallgrímskirkju ómar út í nóttina.
Sunnudaginn 19. ágúst kl. 17: Hannfried Lucke, konsertorganisti og prófessor við Mozarteum-háskólann í Salzburg
Efnisskrá:
Anonymous ca. 1520 My Lady Carey’s Dompe
Johann Sebastian Bach 1685–1750
Fantasía og fúga í g-moll, BWV 542
William Byrd 1543–1623 O mistress mine
Franz Liszt 1811–1886 Evocation à la Chapelle Sixtine
Vítězslav Novák 1870–1949 Prelúdía um móravískt stef
Max Reger 1873–1916 Intermezzo í g-moll op. 80 nr. 6
Sergej Rachmaninoff 1873–1943
Prelúdía í g-moll, op. 23, nr. 5
Umr. Gottfried H. Federlein, 1923
Hannfried Lucke kom fram á fyrstu tónleikaröð Alþjóðlega orgelsumarsins árið 1993 og hefur í framhaldi af því átt farsælt samstarf við Hörð Áskelsson og Mótettukór Hallgrímskirkju. Hannfried lék m.a. með kórnum á tónleikaferðalagi um Mið-Evrópu, á tónleikum í Hallgrímskirkju og í Skálholti. Þá hljóðritaði hann verk eftir Duruflé inn á geisladisk með kórnum sem selst hefur um allan heim.
Hannfried stundaði nám í heimaborg sinni, Freiburg í Þýskalandi, við Mozarteum tónlistarháskólann í Salzburg og hjá Lionel Rogg í Genf í Sviss. Árið 1997 var hann skipaður prófessor í orgelleik í Graz í Austurríki og frá árinu 2000 hefur hann verið prófessor í orgelleik við Mozarteum tónlistarháskólann í Salzburg. Árin 2016 og 2017 var hann einnig afleysingaprófessor við Tónlistarháskólann í Freiburg.
Sem eftirsóttur konsertorganisti hefur Hannfried Lucke leikið á fjölda þekktra orgela í flestum löndum Evrópu auk þess sem leikur hans hefur verið hljóðritaður við mörg þeirra. Þá hefur hann komið fram í USA, Kanada, Japan, Hong Kong og Ástralíu og í fjöldamörgum þekktum tónleikasölum eins og Royal Festival Hall í Lundúnum og í St. Patrick‘s Cathedral og á tónlistarhátíðunum í Vín, Tanglewood í Massachucetts og í d‘Aix-en-Provence í Suður-Frakklandi. Hannfried er virtur kennari á meistaranámskeiðum auk þess að vera dómari í alþjóðlegum keppnum í orgelleik.
