Birna Björk, íbúi í Keilufelli í Breiðholti, hefur nokkrum sinnum vaknað upp við að ókunnugur gestur hefur látið fara vel um sig í rúminu hjá henni og kærastanum. Gesturinn er ekki hættulegur þó að hann hafi ekki fengið formlegt boð um næturgistingu, en um er að ræða kött, sem kúrir í mestu makindum hjá parinu.
Í grúppunni Íbúar-Betra Breiðholt á Facebook birtir Birna mynd af kettinum og spyr hvort einhver kannist við að eiga hann, þar sem hann er ekki með neina ól. „Við getum orðað það svoleiðis að ég hafi gert í buxurnar þegar ég vaknaði með þennan uppí rúmi í morgun, hann er ekki með neina ól. Hann er búinn að koma nokkrum sinnum inn til okkar hérna í Keilufellinu. Kannast einhver við hann?“ skrifar Birna og segist hafa rekið kærastann fram úr til að taka mynd af þeim.
Hún botnar síðan með skemmtilegri staðhæfingu kærastans: „Kærastinn minn heldur því fram að hann eigi heima þar sem 5 börn eiga heima og hann sé bara þreyttur.“
Samkvæmt nýjustu fregnum mun kötturinn vera kominn heim til sín, í bili allavega.
