Það hefur vart farið framhjá nokkrum manni að Justin Bieber kom til landsins í hádeginu í gær en hann heldur tvenna tónleika í Kórnum í Kópavogi, í kvöld og á morgun.

Tók svellið á leigu

Aðdáendur og fjölmiðlafólk tóku á móti Bieber á Reykjavíkurflugvelli í gær. Hann kippti sér lítið upp við athyglina þegar hann gekk út úr einkaþotunni og í tollskoðun. Frá flugvellinum hélt kappinn og fylgdarlið hans í þyrlu í Bláa-Lónið.
Það vakti athygli viðstaddra þegar starfsmenn Reykjavíkurflugvallar báru farangur Bieber úr einkaþotunni en þar mátti meðal annars sjá brimbretti, tvö hjólabretti og íshokkíkylfur.

Heimildir DV herma að Bieber hafi tekið Skautahöllina í Laugardal á leigu í gærkvöldi frá klukkan 20:30 í þeim tilgangi að spila hokkí. En líkt og glöggir aðdáendur Bieber vita þá æfði hann íshokkí í heimalandi sínu Kanada áður en hann varð heimsfrægur poppsöngvari. Hann er sömuleiðis duglegur að stunda íþróttina þegar honum gefst tími til.

Bieber mætti ekki

Foreldrum barna og unglinga sem áttu að vera á æfingum í Skautahöllinni í gærkvöldi var sendur póstur þar sem stóð að vegna óviðráðanlegra ástæðna myndu allar æfingar falla niður um kvöldið.

Mikill viðbúnaður var á svæðinu og lögreglan lokaði um tíma veginum að höllinni. Starfsfólk Skautahallarinnar beið sömuleiðis eftir Bieber með mikilli eftirvæntingu en hann lét hinsvegar aldrei sjá sig.