Mynd Ullu Boje Rasmusen þar sem er fjallað um Thor Jensen – og Björgólf Thor Björgólfsson – hefur vakið nokkra athygli.

Myndin var sýnd í sjónvarpinu í gærkvöldi.

Björgólfur Thor lagði mikla áherslu á það að hann væri eins konar arftaki þessa langafa síns.

Það eru reyndar dálítið skrítin fræði því afkomendur Thors Jensen skipta hundruðum.

En Björgólfur gerði sterkt tilkall til þessa þegar hann keypti Fríkirkjuveg 11, húsið sem Thor gamli reisti.

Hins vegar má segja að hann hafi með nokkrum hætti strikað yfir þetta þegar hann veðsetti húsið upp í rjáfur strax eftir kaupin. Það var eitthvað svo dæmigert fyrir íslenskan útrásarvíking.

Annars má búast við að Björgólfar verði talsvert í fréttum á næstunni, því út er að koma bók sem Þorfinnur Ómarsson hefur skráð eftir Ingimar H. Ingimarssyni.

Ingimar hefur sakað Björgólfsfeðga um að hafa stolið af sér bjórverksmiðjunni í Rússlandi, sem varð undirstaðan í veldi þeirra.

Svo má nefna að í nýútkominni spennusögu Sigrúnar Davíðsdóttur sem nefnist Samhengi hlutanna er persóna sem líkist Björgólfi Thor ansi mikið.

Sigrún nefnir hann Óttar, en það dylst varla neinum að hann er byggður á Björgólfi – og lýsingarnar eru ekki alltaf fagrar.