Það er óhætt að segja að starfsmenn Animal Aid Unlimited í Indlandi hafi unnið kraftaverk þegar þeir björguðu hundinum Oliver frá vísum dauða fyrir skemmstu.

Samtökin sérhæfa sig í því að hirða yfirgefin dýr upp af götum Indlands og hjúkra þeim til heilsu. Starfið er gefandi, eins og meðfylgjandi myndband sýnir, en Oliver fannst nær dauða en lífi undir bifreið fyrr í sumar.

Eins og sést á meðfylgjandi myndbandi var Oliver við afar slæma heilsu þegar starfsmenn samtakanna komu að honum. Hann var horaður, hafði augljóslega étið lítið sem ekki neitt svo dögum skiptir og glímdi þar að auki við ofþornun.

Í fyrstu töldu starfsmenn Animal Aid að næsta ómögulegt yrði að bjarga lífi hans. En þeir reyndu nú samt og sjá ekki eftir því. Á aðeins um tveimur mánuðum gerðust ótrúlegir hlutir. Með góðu fóðri, vatni og talsverðri umhyggju náði Oliver sér á strik – og gott betur en það.

Magnað myndband af þessum fallega hundi má sjá hér að neðan: