Bækurnar um Ísfólkið eftir Margit Sandemo eru nú fáanlegar í fyrsta sinn sem hljóðbækur á íslensku.

Það er Storytel á Íslandi sem framleiðir þennan vinsæla sagnabálk og kynnir hann fyrir nýrri kynslóð lesenda og gefur um leið aðdáendum bókanna tækifæri á að endurnýja kynnin við Silju, Þengil og alla hina í ætt Ísfólksins á nýstárlegan hátt. Bækurnar eru alls 47 og munu allar koma út á Storytel. Fyrsta bókin, Álagafjötrar er þegar komin út og nýjar bækur munu bætast við reglulega.

Það er leikkonan, rapparinn og Reykjavíkurdóttirin Þuríður Blær Jóhannsdóttir sem les en hún las einmitt bækurnar þegar hún var fimmtán ára og hefur því að undanförnu verð að endurnýja kynnin.

Margit Sandemo er fædd í Noregi, en skrifar á sænsku og bókaflokkurinn hefur verið afar vinsæll hjá áskrifendum Storytel í Svíþjóð og víðar. Bækurnar hafa í gegnum árin notið mikilla vinsælda á Íslandi og hafa alls selst í 39 milljónum eintaka víða um heim.

Bækurnar segja söguna um ætt Ísfólksins. Það hvílir bölvun á ættinni vegna þess að ættfaðirinn, Þengill hinn illi, seldi Satani sál sína fyrir langa löngu. Í hverri kynslóð fæðist einn einstaklingur sem skal vera í þjónustu Satans. Sagan um Ísfólkið hefst svo á 16. öld þegar maður fæðist í ættinni sem reynir að snúa hinu illa til góðs. Hann er kallaður Þengill hinn góði.

Storytel opnaði á Íslandi þann 20. febrúar síðastliðinn og býður áskrifendum að streyma öllu efni þjónustunnar, sem telur yfir 30.000 hjlóð- og rafbækur á íslensku og ensku, ótakmarkað gegnum app. Áskrifendur eru komnir á sjöunda þúsund og tugir ánægðra viðskiptavina bætast við daglega.

Storytel hefur gjörbreytt landslaginu fyrir íslenskar hljóðbækur og lagt sitt á vogarskálarnar við að byggja upp löngu tímabæran markað fyrir hljóðbækur. Þannig hefur fyrirtækið framleitt nálægt hundruð hljóðbækur á íslensku en markmiðið er að framleiða 250 bækur á ári eftir íslenska höfunda.

Hljóðbækur er sú grein innan bókageirans sem vex hvað hraðast í heiminum. Áskrifendur Storytel í þeim þrettán löndum sem Storytel starfar voru 621 þúsund að meðaltali á síðasta ársfjórðungi samanborið við um 400 þúsund á öðrum ársjórðungi 2017 og áætlað er að þeir verði um 800 þúsund fyrir árslok.