Fyrrverandi hermenn eru ósáttir við aðstandendur nýjustu Transformers-myndarinnar og er það helst meðferðin á gömlu höfðingjasetri Winstons Churchill, fyrrverandi forsætisráðherra Bretlands, sem veldur hermönnum hugarangri.
Blenheim-höll, eitt þekktasta höfðingjasetur Bretlands, var eitt sinn heimili Churchill en í nýju Transformers-myndinni er höllin notuð sem athvarf Adolfs Hitler. Þá var stórum tjöldum með hakakrossinum á komið fyrir á höllinni. Einhverjir vilja meina að þarna sé verið að sýna fyrrum þjóðarleiðtoga Breta vanvirðingu en Churchill var sem kunnugt er forsætisráðherra Bretlands þegar seinni heimsstyrjöldin stóð yfir.
„Ég veit að þetta er kvikmynd,“ segir Richard Kemp, fyrrverandi yfirmaður herafla Breta í Afganistan, í samtali við breska blaðið The Sun. „En þarna er Churchill sýnd vanvirðing. Hann mun snúa sér við í gröfinni,“ segir hann.
Churchill er grafinn skammt frá höllinni og segir Tony Hayes, yfirmaður Veterans Association í Bretlandi, að hans tilfinning sé sú að margir fyrrverandi hermenn sem börðust í síðari heimsstyrjöldinni séu mótfallnir þessu. Ættaróðalið er nú í eigi fjarskylds ættingja Churchills, Jamie Spencer-Churchill hertoga af Marlborough.
Nýja Transformers-myndin heitir The Last Knight og verður hún frumsýnd á næsta ári.
