Jóhann Jóhannsson mun semja tónlistina í stórmyndinni Blade Runner sem frumsýnd verður á næsta ári. Þetta kom fram í viðtali við Jóhann í þættinum Lestin á Rás 1.

Leikstjóri myndarinnar er Denis Villeneuve en hann leikstýrði einnig myndunum Sicario og Prisoners sem Jóhann samdi tónlist við. Báðar myndirnar hlutu einróma lof gagnrýnenda.

„Það er eins og það sé verið að fela manni mjög mikilvægt verkefni sem ekki má klúðra. Þetta er sannarlega heiður og rosalega gaman að fá að vera með í þessu ævintýri,“ segir Jóhann í þættinum.

Myndin er sjálfstætt framhald stórmyndarinnar Blade Runner sem kom út árið 1982. Meðal leikara í myndinni eru Ryan Gosling, Jared Leto auk Harrison Ford sem fór með aðalhlutverkið í fyrri myndinni.

Tökur á myndinni hófust í sumar og um svipað leyti hófst Jóhann handa við tónsmíðina. Myndin verður sem fyrr segir sýnd á næsta ári.

Frægðarsól Jóhanns í Hollywood hefur risið hratt á undanförnum árum en hann var sem kunnugt er tilnefndur til Óskarsverðlauna fyrir tónlist sína í myndinni The Theory of Everything. Hann fékk Golden Globe-verðlaunin fyrir sömu mynd í ársbyrjun 2015.