Kanye West segir í nýlegu viðtali að hann hafi íhugað sjálfsvíg á árum áður og ræðir einnig gagnrýnina sem hann fékk eftir athugasemdir hans um þrælahald.
Rapparinn þekkti segist hafa haft áhyggjur af því að eiginkona hans, Kim Kardashian, myndi yfirgefa hann eftir að hann hélt því fram að þrælahald „hljómaði eins og val.“
Upphafslag nýjustu plötu West, Ye, ber titilinn I Thought About Killing You. Lagið inniheldur textabrotið „Today I thought about killing you, premeditated murder/I think about killing myself/And I, I love myself way more than I love you,“ eða „Í dag hugsaði ég um að drepa þig, af ásettu ráði, ég hugsa um að taka eigið líf, og ég elska mig meira en ég elska þig.“
Aðspurður um hvort textabrotið væri raunsæ lýsing á hans eigin hugsunum, svaraði hann The New York Times: „Já ég hef hugsað um að taka eigið líf. Það er alltaf valmöguleiki. Eins og Louis CK sagði: Ég fletti gegnum leiðarvísinn. Ég met alla möguleika.“
Hann bætir þó við: „Ég hugsaði það allt til enda. En ef að ég hefði ekki gert það, þá er meiri möguleiki á að ég hefði látið verða af því.“
West hefur áður sagt frá því að hann hafi verið greindur með geðhvarfasýki.
Athugasemdir West um þrælahald komu fram í viðtali hans við vefsíðuna TMZ. „Þegar þú heyrir að þrælahald hafi staðið yfir í 400 ár, 400 ár? Það hljómar eins og val,“ segir hann. Eftir viðtalið fékk hann á sig mikla gagnrýni og segist haga rætt það við fjölskyldumeðlimi hvort að Kim hygðist fara frá honum. „Ég lærði svo margt. Ég lærði um hvað felst í orðinu þræll, ég hugsaði ekki um það í þeirri merkingu,“ segir West og segist aldrei haft sagt að þrælahald væri val.
„Ég sagði að það að vera fastur í einhverju í 400 ár hljómaði, hljómaði eins og val, fyrir mér. Ég sagði aldrei að þrælahald sem slíkt, að vera hlekkjaður í keðjum, væri val.“
