Bandaríski mótorhjólaframleiðandinn Harley-Davidson hefur ákveðið að flytja hluta framleiðslu sinnar frá Bandaríkjunum vegna tollastríðs Bandaríkjanna og ESB. Eftir að Donald Trump, Bandaríkjaforseti, lagði refsitoll á ál og stál frá ESB hækkaði ESB tolla á Harley-Davidson mótorhjóla úr 6% í 31%. Ákvörðun Harley-Davidson er ákveðinn ósigur fyrir Trump sem hefur lofsamað fyrirtækið sem fyrirmynd fyrirtækja með framleiðslu í Bandaríkjunum.

Hærri tollar á mótorhjól í ESB gera að verkum að verð þeirra hækkar að meðaltali um sem svarar til um 330.000 íslenskra króna. Í tilkynningu frá Harley-Davidson segir að þessir tollar taki strax gildi og hafi skaðleg áhrif á sölu fyrirtækisins í Evrópu.

Trump tjáði sig um þess ákvörðun Harley-Davidson á Twitter og sagði vera hissa á henni. Hann sagðist hafa barist af krafti fyrir hagsmunum fyrirtækisins og sagði að í framtíðinni þyrfti það ekki að borga tolla af útflutningi til ESB.

„Tollur er bara afsökun hjá Harley. Verið þolinmóð.“

Sagði hann einnig og vísaði þar til annarra bandarískra fyrirtækja og lauk síðan færslunni með myllumerkinu #MAGA (Make America Great Again) slagorði sínu.

Ákvörðun Harley er töluvert áfall fyrir Trump því hún grefur undan staðhæfingum hans um að verndarstefna muni gagnast bandarísku verkafólki. Þess utan er Harley-Davidson fyrirtæki sem Trump hefur hampað við söluna á boðskap sínum. Forstjóri Harley-Davidson heimsótti Trump í Hvíta húsið á síðasta ári og við það tækifæri lofsamaði Trump fyrirtækið og spáði því enn betri framtíð.

„Takk, Harley-Davidson fyrir að framleiða í Bandaríkjunum.“

Skrifaði hann síðan á Twitter.

Margir sérfræðingar telja að Harley-Davidson hafi aðeins verið fyrsta fyrirtækið til að taka þetta skref og að mörg muni fylgja í kjölfarið, þau verði knúin til þess til að geta lifað af. Þá má spyrja hver hafi ávinning af tollastríðum Trump? Það var einmitt það sem margir fréttamenn gerðu á fréttamannafundi í Hvíta húsinu í gær þar sem Sarah Sanders, fjölmiðlafulltrúi Trump, sat fyrir svörum.

Hún sagði að stefna Trump hefði þegar komið bandarískum efnahag til góða og 300.000 ný störf hefðu orðið til í bandarískum iðnaði og að atvinnuleysi hefði ekki verið minna í tvo áratugi. Hún gagnrýndi ESB fyrir að „reyna að refsa bandarísku verkafólki með ósanngjarnri viðskiptastefnu sem mismunar aðilum“.

Evrópa er stærsti markaður Harley-Davidson utan Bandaríkjanna. Á síðasta ári seldi fyrirtækið um 40.000 mótorhjól í álfunni. Fyrirtækið hefur ekki enn sagt hvaða áhrif fyrirhugaður flutningur mun hafa á 5.200 starfsmenn þess í mótorhjóladeildinni í Bandaríkjunum.