Eða finnst fólki yfirhöfuð notalegt að liggja andvaka í skíðbjartri sumarnótt og horfast í augu við eitthundrað kvistgöt?
Maður spyr sig.
Undanfarin misseri hefur það færst æ meira í móð að mála yfir panel í bæði sumarbústöðum og á heimilum enda birtir mikið yfir þegar það er gert. Þetta hefur yfirleitt tíðkast í bæði Svíþjóð og Danmörku en minna í Noregi. Kannski að það sé ástæðan? Við erum jú komin af Norðmönnum.
Þau sem ekki leggja í að mála panelinn hafa sum hver tekið sér pensil í hönd og bæsað eða borið á hann fallega viðarvörn en eins og sjá má á eftirfarandi myndum er útkoman oft mjög falleg.
Hér hefur ekki aðeins loftið verið málað með hvítri málningu heldur er gólfið einnig lakkað með hvítri háglans málningu. Fyrir vikið fá húsgögnin og listaverkin á veggnum mikið betur notið sín. Takið einnig eftir síðu gluggatjöldunum í bakgrunni og sófabekknum á móti borðstofuborðinu.
Þau sem ekki leggja í að fara „alla leið“ og mála panelinn með einhverjum fallegum lit geta byrjað á að nota viðarbæs til að auka á birtuna.
Takið eftir hvernig bakið á skápnum hefur verið málað í svipuðum tón og sófinn. Restin er í hvítu.
Hér er viðarformið sannarlega látið njóta sín en til að svo megi vera er nauðsynlegt að bera vel á viðinn, þrífa og hugsa vel um hann.
Skandinavískur og ákaflega huggulegur fílingur í þessu koti. Stiginn er flottur við hvítmálaðan panel vegginn. Og hví ekki að hafa plöntur í bústaðnum? Það er hægt að nota sjálfvökvunarkerfi og svo eru margar plöntur sem þurfa mjög litla vökvun.
Hér höfum við fallegt samspil viðarlitarins og hvítmálaða panelsins. Taktu eftir að á gólfinu eru tvær mottur og hér erum við aftur með dragsíðar gardínur.
Fínt skal það vera. Líka í þvottahúsinu! Líklegast ert þú ekki með sérstakt þvottahús í bústaðnum en eins og sjá má á þessari mynd er fallegt að láta gráa og hvíta litinn mætast við borðplötuna og engu skiptir þó að kíttið sé hvítt undir gráa panelnum. Bara lekkert.
